vychiu 之二人三貓のblog: 2011

2011年12月30日星期五

我的嫁衣裳 - Trial Part 2 @ Heanna Bridal

今日，我去咗ESD 朋友仔介紹嘅Heanna Bridal度試衫。

呢間係2011年先開，係尖沙咀樓上舖嚟。佢FREE 2件俾我試。

今次我約埋姊妹Pinky 同 KP，仲有CHIU SAN 一齊去試。今次目標係試一件WG 一件EG。

第一件WG，係佢FACEBOOK見過一件我覺得幾特別嘅，平腳，成條都係用好多紗做嘅，上到去必試嘅一件。點知，着上身好肥，唔好靚，AIYA，浪費咗一個QUOTA喇。

第二件係EG，今次要試紅色，人人話敬酒要着紅色吖MA，幾唔鐘意紅嘅都要識下，盡力搵件我鐘意嘅嚟着。 (tongue)

又咁啱，我一入門口就已經見佢掛咗一見我幾鐘意嘅紅色EG喎。哈哈，就試佢喇。雪紡的，平腳，A LINE 的。試咗上身，又幾OK喎。

咁就試晒兩件，好彩個SALES 唔係係咪見我唔鐘意第一件WG，俾我試多件WG，佢介紹一條大拖尾，上身有少少閃，下身係紗，有啲DESIGN 喎。好，決定試佢。
一試咗上身，我自己都嘩咗一聲，因為着得我好靚 (tongue)

。搞到我心思思想即時JOIN PACKAGE呀。

但係我都未有即時JOIN PACKAGE，話晒我仲有成兩年先BD，而呢間又係新店。雖然我都好喜歡，但要冷靜下先再決定。

2011年12月29日星期四

我的嫁衣裳 - Trial Part I @ Amelia Wedding

今日，我第一次為我嘅嫁衣裳free trial@ Amelia Wedding.

今日同埋姊妹KP 同 chiu san 放工一齊上去。因為係第一次去試衫，心情好興奮呀！

揀呢間係因為之前係婚展佢攞booth，同佢個sales 傾過，都感覺幾好，同埋當時佢show出嚟嘅衫，真係幾靚，grand 啲款嚟嘅，所以就決定上去試下。佢係樓上舖嘅關係，當時只有我哋，無人白撞，感覺好c服，個sales 又OK好人。

睇咗一輪相，我就忍唔住行去睇實物 (smile)

，KP 同 chiu san 就繼續睇相。我一心想試晒啲唔同款嘅gown，因為我實在唔清楚自己着咩好睇。我揀咗美人魚款，ball gown，A line去試晒，有紗有喱士款。因為我中意紗同喱士款多啲 :P。

第一條試條拖尾A line，雖然唔係我心目中果杯茶，因為唔夠紗嘅感覺同埋都係太多DETAILS 嘅嘢，但就顯得我勁瘦腰。chiu san 就直頭鐘意添，佢話好有婚紗FEEL。

第二條試咗條少少VINTAGE款嘅，有少少美人魚FEEL 嘅。呢條就咁睇，超級靚，我就係喺婚展俾呢條裙吸引住。着上身都靚架，如果我唔係豪華團的話 :P。而且成熟咗十倍，我又唔係咁想成熟得咁緊要。我諗我都係唔會揀呢類形喇。

第三條，係BALL GOWN，成條都係紗，平腳，加條BLACK 腰帶，無其它DETAILS 嘢。真係「賣飛佛」 (big grin)

呀！我同KP 都覺得呢個款唔錯。

第四五條，就試唔其它質地嘅GOWN，但我唔太鐘意呢啲紗同喱士以外嘅質地，同埋太多DETAILS嘅。所以唔咩講。

本來係FREE 得5件，突然個sales 話，下個客取消咗booking，俾我試多幾件。haha，我就試咗 3 件EG喇。

試咗件green color，好唔得，係因為我唔襯green color，顯得我好暗啞。 green color 可以唔使諗了。

另一件係鮮粉紅色，直身雪紡加拖尾，好輕好c服，但太無嘢睇，用嚟prewedding 就very good。

最後就試咗一條鮮黃色高腰鬆身平腳款嘅。我同呢隻色都好match 喎。

總結，呢間嘅service 唔錯，啲衫都着得好舒服，質地唔錯，啲款唔娘。呢間一定會考慮。

2011年12月20日星期二

Confirm 咗 Big Day 攝錄喇

上星期六(17/12)，我哋又去婚展，今次主要係confirm Big Day 嘅攝錄，同埋想睇下啲婚紗。

因為好有目標，想去返prewedding 果間度 join 攝錄 package，所以入場不夠30分鐘，就KO咗 Big Day 攝錄喇！都係用埋Picasso 囉！

另外，就係睇下衫喇！婚展就係夠集中，高中低路線嘅衫都會有booth，乜都睇下。實在有好多間，我就專搵啲有free 試衫果啲，唔會即場firm package。衫都未試，就叫我join package，無可能呢！:p 搵咗一啲shop，諗住出年開始逐間試衫喇！哈哈！

而家啲大項目都confirm 晒！其它都唔急得了。

2011年11月27日星期日

試行宇宙餐之晚餐

今日，2011.11.27
試行宇宙餐之晚餐
今次試煲雜菜湯

湯料：
椰菜一個; 西芹兩條; 甘荀三條; 薯仔兩個; 蕃茄四個; 粟米仔一幾條; 粟米粒一罐

再試整雞柳草菇

材料：雞扒兩塊; 草菇一罐

完成品

開餐喇！！！！

試行宇宙餐

今日，就試行宇宙餐。

今朝我嘅早餐係，登登登登

一個橙 + 兩條蕉

HAHAHAHAHA，唔係好夠飽，下次加個奇異果先！

2011年11月26日星期六

我想減肥呀

雖然離BIG DAY 仲有好耐，但減肥其實係女仔嘅終身事業，哈哈哈哈！我由而家起都想減肥喇。
之前有食開西柚餐，其實係WORK嘅，不過一停就會即刻肥返，因為我係好鐘意食嘢！會不停食嘢果啲人嚟架！
我睇BOLG 同聽朋友講，宇宙飲食法，又想試下，聽講會健康啲喎，TRY TRY 先，都唔難跟呀好似！:P

2011年11月23日星期三

兩年後的今天

今日係2011/11/23，兩年後的今天，就係我哋嘅大日子。(心裏暗暗興奮)
雖然話仲有兩年咁耐，但今日在想像兩年後的今日，心情突然傻傻的緊張起來。
哈哈！11/23這個日子，由現在起對我來說已經有着很特別的意義了。 (smile)

2011年11月7日星期一

三文治小虎妹

小虎妹喜歡係我張床度hea, 最鐘意係啲被度瞓, 今次變咗三文治小虎妹呀, hahaha!!!

2011年11月6日星期日

小美人呀

小虎妹有時都好斯文架，你睇佢，扮小美人呀，HAHAHAHA，真係愛死佢呀!!!! (love struck)

我們要結婚了

終於，我哋要結婚了，哈哈，婚期係2013/11/23，對呀，兩年後呀！要開始籌備了。唔搞唔知，原來有好多好多嘢搞的。

尋日，我同CHIU さん去咗婚紗展，心中本來係想睇下先，參考下有咩要做，但竟然俾我哋confrim咗個items喎。哈哈！

=========================================================

酒席：
其實我哋一開始暫定婚期，第一件事就係諗擺唔擺酒，因為之前一路話唔擺唔擺。但原來到咗真係要結婚喇，要着手搞喇，心底係想擺架喎！

於是，第一件事，搵酒席喇。一路上網睇，又參考朋友嘅意見，攞酒其實唔使要豪華嘅場地，只要啲個場ok，啲嘢食又ok，就ok喇，只係志在親友們能夠盡興。
所以我唔揀酒店，只搵酒樓。最後，我心目中係揀咗尖沙咀文化中心嘅映月樓(美心的)。所以，以前專登上去睇過場，又飲過茶，又去試過晚飯，確係唔錯。

一路未book，係因為唔知要攞幾多圍囉。咁尋日去到婚展，美心又有攞booth喎，又怕呢個日子俾人book咗，咁就決心book咗喇，圍數就預多咗少少，到時可以減的呀，攞幾多，就收幾多錢囉，只要meet 到 min. charge 就ok喇。

book咗之後，感覺好唔同，一齊就好似突然變成了事實，我.....真係嫁得出喇。哈哈哈！好開心呢！

Pre-Wedding：
喺婚展，最意外嘅，係confirm埋 Pre-Wedding。之前上網睇，呢類型嘅公司實在太多喇，本港... 外地.....多到不得了。我哋坐底咗好幾間，都係影本港嘅，有啲都OK，但實在係貴，唔吸引我即刻決定。到最後，經過一間叫Picasso Wedding Centre 嘅Booth，係去OVERSEAS影嘅，個價錢同係本港影差唔多，仲要全部相原檔俾返我哋，唔使買相喎，VERY GOOD喎，仲要係有我哋最鐘意嘅日本喎，啲相又真係影得好靚，至少我同CHIU さん都鐘意，我哋只係出機票喎。

我心動了，我同CHIU さん退席一陣商議，哈哈，要冷靜一下先得吖MA。以前我一路夢想係日本影Pre-Wedding ，以為會好貴，一路唔敢諗，點知咁都俾我哋遇到間價錢合理，又係去日本影嘅，教我如何可以唔JOIN佢哋個PACKAGE吖！好快，我同CHIU さん就折返，去落訂囉，哈哈哈。我哋係揀咗下年2012年10月去輕井沢影紅葉呀。好期待呀！！！！

=========================================================

仲有好多好多嘢未搞，未定，不過我哋仲有時間呀，之後有咩進展，再係度UPDATE一下喇！