我的紫羅蘭開花了

我好鐘意種紫羅蘭，買買埋埋都唔少，
以前有心機啲，啲花開得好靚架，
後來就.... 得啲葉囉，都唔係好敢再買了。

上年啲花都死得七七八八，我又忍唔住又買一棵返嚟種，
買咗佢返嚟都有三個月，之前買返嚟時開住嘅花謝晒之後，
一路都無開花，而家終於開花了，Yeah!!!! 

媽咪飯香

由細到大，食慣媽咪煮嘅飯，真係會食唔慣別人煮嘅飯(除咗我自己煮 :p)。唔知大家有無呢種感覺呢。

昨日返咗媽咪屋企食飯，媽咪可能知我唔整魚，好耐無食魚，所以整魚俾我食，haha！對媽咪煮嘅嘢，好似習慣咗咁，佢點煮，我都唔會覺得唔好食，雖然佢成日話自己唔識煮，而佢又唔係煮啲咩山珍海味，但夠我哋食到lam lam 脷，haha！

香港 prewedding 20130307 - 相片預覽@魔星嶺 -女單

攝影師俾多一張相出嚟引我呀！
嘩！影到我好似好靚咁呀！
其實爬棵樹時，我係驚到死架！好彩我堅持爬上去咋！

三餸一湯 - 16 Mar 2013

有住家飯食實在太開心，所以一星期內我煮咗三日，haha，唔知又可以keep到煮幾多日。

無煲湯都成半年，真係要飲下湯。粉葛赤小豆，簡單又好味。

今次再整黑椒蜜糖雞亦，好味過上次呀，chiu san 勁讚呀。

個西蘭花蟹柳，都唔錯喎，送飯一流呀。不過今次嘅肉餅就硬咗啲。下次再加油！

香港 prewedding 20130307 - 相片預覽@中環域多利監獄

今日攝影師多放多張香港prewedding嘅相出嚟

好鐘意呢張相呀，好有feel呀

初試跳鄭多燕

我又試新嘅減肥方法啦！尋日係facebook見到有人話跳咗一個月鄭多燕就瘦咗10磅喎，我梗係想試下喇！

齋睇段片，睇落好easy，於是返,屋企即刻試。原來，動作簡單但不停重覆，係好辛苦架！但我都完成晒成個舞。結果係，成身汗，攰到爆！

我諗，真係work架喎，而且今朝起身好精神，啲筋骨好似拉鬆咗咁，好舒服喎！今晚返去有時間的話再玩，希望keep到玩。我都想瘦10磅呀！

果位facebook朋友就係跳下面呢段，我都係跳呢個呀！

住家飯

太耐無食煮家飯，成日出街食，又貴又唔好味又唔夠飽，食到唔想再食啦！
餓住家飯太耐，都係要迫住放工買餸煮飯喇！

尋日兩個人煮三個餸，預埋我lunch帶飯，啱啱好！

昨天晚餐：黑椒蜜糖雞亦(食譜)，蒜蓉炒菜芯，梅菜肉餅

第一次整黑椒蜜糖雞亦，chiu san讚不絕口，係唔夠黑椒，哈哈，下次再整俾佢食喇。
梅菜肉餅都係第一次整，簡單又好味，食到chiu san lam lam脷！

香港 prewedding 20130307 - 相片預覽篇

7 Mar 2013(四) 終於都影埋香港嘅prewedding 喇，呢日天公造美，陽光普照，之一兩天都仲係天陰陰，濕濕地咁架！加上上次己經拍過嘅Picasso - Raymond 同 好好玩mau Annie，令呢次嘅prewedding
影得非常咁開心。

 

呢張相係Raymond 影完第二日俾住我哋睇嘅相，佢報我哋執過嚟嘅，我哋邊有咁高咁瘦吖，hahahaha，不過個效果超好呀！好期待到揀相之日呀！

 

PS. 相中緍紗就係我之前係淘寶買嘅其中一件，影出嚟真係唔錯呀！

 (Wedding 淘寶 之 香港
prewedding 婚紗篇)

呀Dee 都行咗成貓禮喇

呀Dee都係8/3/2013
(fri) 進行咗成貓禮(即係絕育手術)喇！今次佢同小虎妹家姐一樣係大圍珍禽異獸醫院做。

上次呀Mee係NPV做絕育手術，我真係十級後悔。初初諗住呀Dee同呀Mee都要做，好貴架嘛，又搞緊結婚，唔好以花太多錢。所以諗住兩隻都係NPV做喇！

貓女6個月就可以做絕育，仔就要9個月大先做得。所以呀Mee係做先嘅。但當做完手術接咗返嚟我就後悔喇。

1.    
個傷口開正係肚中間；
2.    
傷口好大；
3.    
縫線縫得好差；
4.    
又要拆線；
5.    
因為係明線，仲要困住佢，又要戴喇叭兩星期！

真係心痛架，真係好好好好後悔係帶咗呀Mee 去NPV做。

所以今次到呀Dee，貴少少都要去返小虎妹做得唔錯嘅大圍珍禽異獸醫院度做。今次好好彩仲係Dr. Peter 做嘅。我覺得Dr. Peter 好有愛心，之前小虎妹唔舒服嚟睇佢，佢都好細心。所以今次Dr. Peter 幫呀Dee做手術，我好放心。

護士助手仲好細心解釋個手術點做，點開刀。仲有， 我覺得好出奇嘅係，界咗兩刀係可以唔使縫針，唔使做小喇叭！而個痛口又真係唔會爆。

呀Dee 返到屋企係有少少呆滯之外，一切都好ok，好似無傷口咁。實在係太好了。可憐呀Mee 就受咗啲苦喇！

呀Dee做完手術返嚟仲即刻玩新買俾佢嘅波波添呀！