呀DEE 同呀MEE 加入咗呢個家庭差不多四個月喇

呀DEE 同呀MEE 加入咗呢個家庭差不多四個月喇!

時間過得快, 佢哋大得仲快, 嚟嘅時候細細粒,
因為太輕, 抱上手仲驚整親佢

到咗今日, 呀DEE已經係唔可以用一隻手好穩陣咁抱LA, 重到C 呀佢!

最近一個月, 呀DEE 有個好冧人嘅習慣,
就係每朝房門一打開, 佢就會走上嚟張床度,
震住機, 咕咕聲, 兼high 身high勢咁叫我起身
佢哋震機聲大到佢係床近我係床頭我都聽到

最近一兩日，似乎呀MEE都有樣學樣
當我以為係呀DEE 係我身邊, 我一手抱落去
咦, 細隻咗咁多嘅, 原來係呀MEE 嚟, hahaha
我起身一睇, 兩隻上晒床囉, kakakaka
呢兩隻傻貓開始爭寵la 

至於小虎妹呢, 佢呢個傻妹梗係就唔理咁多
係個廳度嘆早餐囉, HAHA

貓優先座

而家我哋個窩居已經貓多過人
佢哋係尊貴嘅貓仔
我哋只係貓奴

我哋每一晚放工返到屋企
第一件事就係服侍尊貴嘅貓仔食dinner
清潔經過一日飛簷走壁之後大量嘅貓砂及垃圾
清潔三貓嘅大小二便
抺地、抺枱、抺梳化

清潔好，佢哋就可以係干淨嘅屋企度hea 喇

窩居所有嘅櫈，不時會俾三貓坐晒囉
有相為証

唔緊要喇，你哋坐喇
有你哋係身邊，我哋覺得好幸福架！

貓奴的自白

淘寶 ● 寵物用品 之 貓窩

上次淘寶，除咗淘我哋嘅嘢之外
都有淘咗兩個貓窩俾三隻貓貓

天氣凍喇，佢哋成日瞓係地
所以買咗兩個一樣樣嘅貓窩俾三隻嘢
因為屋企太細，只能三貓share兩個喇

RMB25蚊一個，瞓一年都抵喇！

但一開始，似乎只有小虎妹對個貓窩有興趣
另一邊廂就貓有貓凍，窩有窩凍喇

睇下小虎妹幾咁enjoy!!

小虎妹：好c服呀！軟綿綿咁，hea吓先！

明年今日 - 23 Nov 2013

仲有一年，
 明年今日，我要成為Mrs. 喇！
明年今日，是我們重要的日子呀！
期待着明年今日，但又非常enjoy 婚禮籌備嘅日子，
有點不捨已過去一年籌備嘅日子
仲有一年咋，我要好好enjoy呀！

排排坐

呀dee呀mee加入咗呢個家都就嚟三個月喇
雖然小虎妹家姐仲未能完全接受到
仲未做要你親我我親你咁
但昨天驚見小虎妹同呀dee排排坐喎
真係第一次咋，平時呀dee 一行埋佢
小虎妹就會即刻彈走架

今次都hold 咗好一陣仲有時間俾我去攞電話影底呢個場面

有時我哋打閙呀dee呀mee

小虎妹會走過嚟交我哋

帶完小虎妹出去睇醫生

呀dee呀mee會走埋佢安慰下佢

其實佢哋都有晒感情架喇

不過係都要收埋收埋

ha ha, 唔使怕醜喎，我哋唔會笑你哋架

快啲相親相愛喇！

小虎妹回勇la

小虎妹病完一輪，個樣殘咗一輪
近日終於都漸漸回勇，變返大眼Cutie版小虎妹喇！

Wedding 淘寶 之 田園feel相架

淘立體字嘅同時，我都淘咗啲相架係big day 可以放係album table
俾我搵到心目中想要嘅白色田園feel相架
仲唔係巧貴，下圖四樣嘢都只係RMB108.90(連送中轉站運費)

質素都好好喎，chiu san 都讚啲相架買得靚呢！

淘寶Ref.: http://item.taobao.com/item.htm?spm=a1z10.1.w3339505.7.MNOFZQ&id=9134926672

Wedding 淘寶 之 立體字攞設製成品

之前訂嘅立體字昨天收到喇！哈哈！好靚呀！
chiu san勁鐘意，話物有所值呀！

又真係唔錯架，摸上手，都唔係好膠，好有木嘅感覺！
我啲就結婚嘅同事都有興趣做呢個呢！
之後就係睇下點加工喇！

三貓搞笑合照

dee 同呀mee 而家好痴身，

尤其呀mee，一有位，佢一定會攝埋嚟我一返到屋企坐低，呀mee必會一馬當先，坐大脾。

呢張相就係呀mee坐我大脾，

呀dee 係度玩呀mee條尾仔，

小虎妹就係度屎面不滿我俾呀mee霸咗。

呢個合照真係好搞笑。

vychiu's Wedding 之 証婚場地 - 伊甸園玻璃教堂

10 Nov 2012 (Sat)係伊甸園嘅open day，我同chiu san 就襯呢個時間去實地睇下。

呢度雖然細，但影相出嚟嘅效果真係好好，希望big day當日好似今日咁好天就好喇！

呢度真係一個好靚嘅註冊場呀！
定咗呢個場，我連註冊嘅婚紗都有idea，如果找到心中嘅婚紗，成件事會好靚，希望會搵到la

又一張軽井沢perwedding 喇

今日picasso 終於post 咗另一張我哋嘅軽井沢perwedding 相喇！
真係好靚呀啲紅葉，應該話黃葉先啱，黃到好似金色咁，好靚呀！
攝影師Raymond 又真係攞得啲景好靚。

真係好心急佢哋Call我哋去睇相囉！

 

vychiu's Wedding 之 場地佈置

今日約咗Oscar Wedding 傾一傾有關我哋場地嘅佈置。

本身酒樓係有包基本佈置，但係，越諗越唔多鐘意，chiu san更十分想做場地佈置，於是我又着手搵Decoration 嘅資料。

上網搵到唔少Decoration 嘅公司，質素同價錢都好參次。當中Oscar Wedding 啲嘢好靚，心想一定好貴喇，十月中時，都叫佢報吓價喇。當收到佢報價，發覺價錢非常合理，可以話咁嘅質素真係抵添喇！

我同chiu san好一致咁都好鐘意佢啲嘢，於是就約今日放工出嚟傾下。佢哋嘅office本身對我哋嚟講一啲都唔就腳，但佢好好人咁可以約我哋係TST嘅coffee shop傾。

Oscar 好nice 好好人，我有好多問題佢都一一答我，而且佢啲嘢真係好靚，價錢真係好抵，而且好多嘢都唔使加錢都會做，傾咗一個鐘左右，我哋都confirm 咗搵佢做場地佈置喇。

有幾抵？如果接布加die cut foam board, 有晒sitting plan, 相簿枱等等呢啲基本嘢，有埋photo corner呢啲嘢，加埋都唔使一萬呀！仲要係靚嘅，我真係覺得好抵呀。

太好了，又confirm多一樣嘢了。

佢啲Job真係好靚架！以下佢facebook show 出嚟嘅作品

貓哋打敗仗

自從係日本返嚟，小虎妹連續睇咗兩個星期醫生，到而家仲未好返晒。唉！

其實由未出發之前一兩日，已經發現佢有小小大細眼嘅情況，諗住無乜事。點知係日本嘅時候，幫手照顧小虎妹嘅朋友話俾我哋知，小虎妹keep住大細眼嘅狀態，實在擔心。

返到香港，見佢情況的確嚴重過之前，可能太掛住我哋嘅關係，因為佢見到我哋好開心。於是又觀察多一日先。

但都無好轉，於是27/10/2012就帶咗呢位小公主去睇醫生。睇開果個醫生放假，要另一個醫生睇，仲好，我覺得之前個醫生無乜愛心，至少唔係咁鐘意貓先囉我覺得。

事緣，上次(九月尾)小虎妹嘔水嘔糧，佢乜都話唔知小虎妹咩事，摸兩摸無發現，就要小虎妹留醫，又話要驗n咁多樣嘢，嚇到我一個女人仔心都離埋，最後我都無俾小虎妹留醫同驗乜驗物，照呢樣照果樣。心痛架ma，小虎妹除咗嘔水嘔糧，乜事都無，你就搞咁多嘢，我帶佢睇醫生已經嚇到佢半死，仲話要佢留院搞咁多嘢，無事都變有事la，仲有呀，佢以為我唔要佢，心情低落咪又病多啲…..，後尾咪無事囉。

話說回來，今次個醫生話小虎妹未適應到兩個細佬妹，所以抵抗加差咗，眼仔並無大問題，只係小小發炎。太好喇，安心晒，只係要返去覆診。

3/11/2012又去覆診，唉，眼細未好晒，又嚟打乞次，醫生都係話抵抗力差， 今次加咗啲抗生素俾佢食。都好，我都想佢食。

但係人食抗生素都食到死下死下，可況小虎妹食咗4日藥喇，無晒胃口，失晒聽聲，陰公…但整體嚟講，好咗。

 佢唔肯食干糧，咪俾佢最鐘意嘅濕糧佢食，咁樣佢就好好胃口，見到佢肯食嘢，即刻放下心頭大石，佢一食返嘢，即刻精神返晒。

 仲有呀，呀dee同呀mee
都有乞次情況，係咁嘅情況下，各貓都加重靈芝嘅份量，一日一粒開水俾三隻分兩次食，好彩地，大家都有好轉。

 貓呀貓，你哋要身體健康呀！

Wedding 淘寶 之 立體字攞設

之前睇過其它blog 友為佢哋嘅wedding 整咗啲立體字，好靚，又能夠代表自己嘅，一路都想為vychiu's wedding做返個，prewedding又可以攞去影相，big day完咗又可以放係屋企做紀念，我真係好想有一個。今日終於決定咗落單喇！

去返blog 友做果間問問，個客務不錯呀，會建議你做幾大，唔會一味只叫我做貴果啲，仲提議我個英文名簡寫要加厚，否則企唔隱呀！傾咗一陣，我都落咗單喇！我一落單，佢就好快手咁做咗幾個稿俾我揀字型，10多分鐘已經有得睇，我都好快決定咗字型，三日左右就會發貨喇！

我分別做咗我哋英文名嘅簡寫同我哋big day個日子，白色嘅，收到貨打算會再加工一下，咁先夠個人化吖ma！


淨係睇個稿都覺得好靚喇！期待收貨呀！

Big Day 日子訂咗10cm高      

英文名簡寫訂咗25cm高    

淘寶參考: http://item.taobao.com/item.htm?id=14694915473, http://item.taobao.com/item.htm?id=16640960351

2012年11月婚展 之 香港Prewedding篇

香港Prewedding篇

我同Chiu san一早都決定係香港影多一輯Prewedding架喇，今次婚展，順便搞埋喇。

我哋上次影軽井沢咁開心，梗係join 返 Picasso喇，又搵返Raymond影喇，big day攝錄我哋都firm咗搵返佢喇，哈哈哈。佢好旺場呢。

呢輯我哋決定係明年三月頭影喇，雖然無去日本影咁期待，但都別具意義架，又要keep fit同準備衫la。

2012年11月婚展 之 証婚場地篇

証婚場地篇

今次婚展主要係想KO呢個項目。

我一路都想註冊搵一個証婚場地舉行。因為我想多個地方影相，而又想著多件WG。

之前一路都有留意啲証婚場地，主要係尖沙咀區，但好多都唔係好鐘意。一係就要連Lunch搞，好貴喎，唔係咁啱囉。

尋日婚展，去返之前幫找哋影Prewedding 呀Raymond，佢咁有經驗，問佢邊度証婚好。佢提議伊甸園嘅Glass Chapel。之前我都上網睇過，都幾靚，係九龍塘嘅，都OK吖，於是即刻去問下先。

 

搵到個booth喎，問咗一輪，都ok喎，有得只係book 註婚半小時喎，價錢ok喎。其實佢都係連小吃嘅，不過我哋商議後(又搵Raymond傾)，只book半小時註婚就ok la。

太好喇，KO咗呢件心頭事la。

2012年11月婚展 之 我們的婚介

 

婚介篇

昨天去咗婚展，我哋KO咗三個項目。其中我哋竟然突然決定咗婚介呢個項目。

一直以嚟，婚介呢個items都未有決定。平、貴嘅品牌的睇過，遇到有啱心水嘅，就唔啱預算，一係啱預算就唔啱心水。

尋日去婚展，本身主打唔係睇婚介，見有啲唔同品牌係度，就順道睇下喇。咁啱，又俾我哋係Mabelle (之前係無睇過呢個品牌嘅)見到一對我哋好啱心水嘅，價錢又啱嘅婚介喎，會場有七折/送天鵝婚介盒，係18K白金。本身都心大心細嘅，婚介戴一世架嘛，咁快決定好似好急咁，我哋都係行下其它嘢先，諗清楚先得。

到行晒其它嘢，我都係覺得唔錯。因為：

• 款簡單得嚟唔係太普通，女介都有啲碎石
• 難得搵到隻男介係合心意而CHIU san又like
• 我哋兩個戴得好睇
• 我好鐘意(CHIU san 話最緊要我鐘意)

(呢對係會場display果對嚟嘅，我哋就係揀咗呢款LA)

於是就咁，決定了。訂了婚介，五個星期後就有得取貨喇，到時size OK，就會再安排刻名。

軽井沢Prewedding - 非正式照片

軽井沢prewedding 當日化妝師手機的照片
期待着official 的照片呀