拜山日誌

前日同尋日兩日假期嘅節目，都係有[拜山]這一環。

 

星期六，天氣好好，有啲太陽，仲有啲熱添，chiu san第一次帶我去拜佢爺爺。佢爺爺係喺荔枝角嘅天主教墳場，果度環境都唔錯咁呀，空氣都好清新，因為係天主教嘅關係，無人燒香，唔會煙。上咗去一陣，因為咩都唔使做，我地就走喇。其實chiu san未見過佢爺爺，但佢話自己好耐無探爺爺，好內疚，所以今年一定要去探佢，佢話自己嘅長輩係好值得自己去尊重，嘩！chiu san真係好有孝心呀！

 

星期日，天氣一樣咁好，一早就同媽咪去拜公公婆婆[佢地而家係一齊係同一個位]。[拜山]真係一種孝心嘅表現，唔知係唔要表現呢種孝心，所以啲山墳永遠都喺好遠好高。我同媽咪坐車去到柴灣墳場山腳，就要行一段非常斜路上山，已經好好喇，因為係石屎路。其實尋日仲好多人添，啲police已經封晒路。我同媽咪行呀行，我行到周身汗，終於到咗公公婆婆個骨灰塔，公公婆婆係7樓，因為人多，所以煙火鼎盛，上到去見到公公婆婆，就開始放啲雞同燒肉出嚟，同埋點香。我覺得設計呢個骨灰塔嘅人想所有嚟拜祭嘅人都係孝子賢孫，於是將啲煙局晒係塔入面，個個都好孝順咁一邊拜祭祖先，一邊掉下眼淚來。設計得非常好。