2007澳門夏天之旅 - 第一天之二 - 2007.8.19 (日)

離開咗新蒲京，我哋就坐巴士去旅遊塔。其實我哋對旅遊塔興趣不大，但因為買package嘅時候俾我發現呢度有一個hello kitty展，於是，我哋就嚟咗旅遊塔喇！

嚟到喇，呢度就係塔嘅入口喇！

見到kitty喇！

睇展覽，就要上一樓。連電梯都有kitty & friends歡迎你呀！

門口大幾個kitty & friends係度等你，我就梗係唔放過同kitty影相嘅機會喇！

一入到去就係kitty間房，好靚呀，我嘅dream bedroom呀！


仲有一堆kitty喺房添呀！

其它房就有唔同主題，唔係只有kitty，好似呢個就有布丁狗同XO！

呢間就以老騮仔做主題！

最後，都係kitty為主題，我好鍾意呢個公仔呀，有個人咁高架！

其實佢所謂嘅kitty展，都無嘢睇，得幾間房，唔使十分鍾行晒！有啲被騙嘅感覺！

kitty入場卷係包埋觀光塔嘅入場費，於是，我哋又上埋觀光塔睇吓！呢度係59樓，其中有啲地皮係玻璃做架，可以望到地面，其實chiu san好驚，手心出汗，不過人一世物一世，幾大都要佢喺度影返張相喇！

真係好高架！

跟住，我哋上咗6x樓，唔係好記得係幾多，呢度可以講係露天嘅，可以俾遊客出去行一個圈，不過每位好似成200蚊呀！咁我梗係無行喇，chiu san畏高，更加唔使諗喇！不過你睇個小妹妹幾大膽，佢個樣一啲都唔驚咁！勁呀！

仲咁啱俾我哋見到有兩個外籍人士玩笨豬跳！嘩！勁呀！幾大都睇埋佢跳呀！不過我太過緊張同掛住睇，唔記得影相，哈哈！

睇完笨豬跳，都成兩點幾喇，仲未食嘢，於是就去澳門議事亭果邊嘅珠記得麵。其實我哋之前都未食過呢間，係睇書話呢度ok，而且價錢平，於是我哋嚟試一試。又幾好喎！下次可以再去食

食完都三點喇，係時候去酒店攞房喇！於是我哋於坐巴士去氹仔嘅君怡酒店喇！順便休息一下，準備出發去官也街食我哋期望已久嘅山度士餐廳！

我哋瞓咗一陣晏覺，6:00就出發，行去官也街(君怡酒店同官也街係好近)，我哋摱慢行，6:30就到喇，呢間餐廳我個人認為值得推介，由其係佢嘅葡式炒蜆，好味到不得了呀！

我有朋友仔話去到官也街都搵唔到山度士餐廳，於是我專登影底佢個門口俾大家睇，咁一定搵到喇！記得唔好太早去呀，因為佢哋6:30先開始做晚市架！

點完菜，佢例必會送上餐包仔，一人一個！我哋仲order咗兩支葡國汽水添，都幾好味架！我哋飲嘅係熱情果味！

我哋最最最期待嘅葡式炒蜆呀，真係好好味，酸酸咁，好開胃醒神，o~i~shi~


今次我哋仲order咗燒盧魚，跟薯菜嘅！

燒牛串，佩薯條！佢樣樣都大大份，真係好飽，不過，個葡式炒蜆就真係太好味，於是我哋又order多一客攞返酒店慢慢食。就咁，我哋第一天嘅行程就咁完滿結束喇！