2007澳門夏天之旅 - 第一天 - 2007.8.19 (日)

2007.8.19 (日) 晴

chiu san一早08:00就已經係我屋企附近嘅大排檔等我，一齊食過好好味嘅早餐，就出發出尖沙咀港澳碼頭喇！

計埋今次，我同chiu san第四年去澳門喇，每年我生日，chiu san都一定會同我去澳門行一趟，relax一下，雖然近近地，但係都好開心架！

我哋坐10:00船，唔知係咪星期日嘅關係，超多人去澳門，仲要勁多大陸人，唉~ 講明先，我唔係想歧視大陸人，不過佢哋大部實在好嘈，又實在好無禮貌，又橫行無度，唉~ 今次大部分旅程都被呢啲大陸人搞到無乜癮。

一上船，有無咁嘈呀，我都未試過搭船嘅時候係咁嘈，啲大陸人..... 唉! 去過澳門嘅人都知，係有劃位，唔係亂咁坐，我同chiu san搵到我哋個位，見到有兩個大陸父子企係我哋個位度，想坐落去，有無搞錯，係咪真係唔識字到呢個地步，數目字都唔識睇呀。

chiu san行埋去本來好有禮貌咁叫佢，佢哋可能唔慣以禮相待，當chiu san透明，於是chiu san就好大聲「喂！」咗佢哋一下，佢哋就行開，擺明係知自己唔係坐呢度，如果無人叫佢想博大冒喇！哼！點知，呢頭走咗一對父子，果頭又唔知係邊度走嚟一對母子，又想二話不說咁坐落去，頂！我火都嚟埋，好大聲「喂！」佢哋，佢哋即刻閃開。終於可以坐底喇！今次真係未出發，先激氣呀！

成船都係大陸人，真係嘈到不得之了，唯有成程船都攞NDS塞住耳仔。經過一個小時嘅船程，我哋終於到澳門喇！

其實我哋係坐新渡輪，只係落船行過影吓人哋架船！

每次嚟到都例必係碼頭嘅旅遊詢問處攞地圖喇！你哋見唔見到chiu san呀！佢係呢張相入面架！

因為今次我哋想去新葡京嘅自助山食自助餐，聽同事講一定要book位，於是我哋隨即去坐新葡京嘅免費巴去book 位。有啲緊張，第一次去新葡京，好心急，唔知係咪好靚架呢！？

到喇到喇！又真係幾靚喎！個天花好高呀，好大呀，都幾靚。仲好多人添！

呢度就係賭場入口喇！哈哈，賭對我倆嚟講，無乜吸引力，都係快啲去book自助餐先。

chiu san同果啲姐姐book緊枱呀！

新葡京上蓋

葡京外觀

好~ book咗20.8去食，去下一站，旅遊塔。去搭巴士喇，出到門口，先知，原來葡京同新葡京真係咁近架！只係一條碼路之隔！

 

其實澳門真係一個幾靚嘅地方，你睇，係馬路中間竟然有個噴水池，好似個公園咁，好寫意呀！

 

~~待續~~