2007.8.8 - 今年第一個風球

8.8.2007 (星期三) 雨, 1號強風信號

熱咗成個月，呢幾日終於都涼返啲喇，不時有幾陣雨，原來係想打風呀！終於今年都掛成1號風球。臨放工大約5點左右，成個天黑晒，係勁黑，跟住個天就落勁大雨，真係好大雨。好彩朝早返工時都覺天氣麻麻，帶埋把遮返工。

到咗5:30放工，雨又細返喇，咁我就行去天星碼頭搭船過尖沙咀會合chiu san。今年第一次打風，有點興奮，因為我都幾鍾意打風，好細個開始我好鍾意聽風聲、雷聲，尤其好鍾意打風時三更半夜嘅風聲，我覺得呢啲聲好有安全感，因為係來自大然，好似可以洗滌身心咁；但我又好唔鍾意返工放工時落雨，因為就算有遮，都會搞到成隻腳都濕晒。感覺好難受呀！所以最好就係三更半夜橫風橫雨，係咁嘅情況下，都瞓得零舍舒服呀！

去到尖沙咀，直頭無晒雨，不過個天一樣咁灰。係碼頭，呢啲時候梗唔少得啲記者係度拍打風嘅情況喇！我諗佢哋一定會好失望喇，因為風平浪靜，拍唔到横風橫雨呢！