空中巨無霸 - A380

3 Sept 2007 (一) 晴

一早返工，話晒都係第一日正式開學，多咗好多人一齊搭車，去到尖沙咀，發現咗一樣奇怪嘅現象，連尖沙咀都多咗好多人，仲要唔係學生，大部份都係上咗年紀嘅，有好多仲好兩夫婦拍住拖咁去尖沙咀。我就覺得好奇怪，今日開學日姐，但無理由會咁

。由尖東站行去天星途中，先聽到啲保安話有嘢睇，我諗諗吓，先記得A380會大約係8:00係維港上空經過，原來啲人係嚟睇A380架！哈哈，咁大件事我都唔記得喎！

我一路行、搭船都有留意個天，我都好想睇吓A380係有幾大。等吓等吓，我返到公司都未見佢嘅蹤影，好彩我個位係窗口位，我返到公司，第一時間攞定個相機，關定放係枱，等佢經過。等咗一陣，聽到有啲聲，即刻攞起相機，好快，我就見到A380喇，即刻影底佢。佢飛得太快，我只係影得一張相咋，不過已經好開心喇！

後來，睇新聞先知，雖然A380超級大架，但耗油量竟然比一架747少一成幾，嘩，好勁呀！如果我有生之年可以坐到呢架A380就好喇！