激光

夏天又嚟喇，姊妹們又要為佢哋嘅終生事業努力喇，就係脫毛。

眼下越來越興永久脫毛(腋下)，聽落的確方便，一勞永逸喎，我都想喇，不過一向都知貴，從來都無action過，或者做吓資料搜集咁！

近日，朋友仔W好有興趣永久消取呢個煩惱，好努力咁周圍搵資料，比較效果同價錢，得知原來係有得免費試做一次激光脫毛架，於是bk咗今日，我同佢一齊去試做。

我哋今日去咗站於北京道一號嘅"de??s"度做，果度好靚架，入到去又有阿姐問你飲飲茶，仲有得揀柚子蜜果啲，服務同環境一流架。做咗小小嘅資料登記後，我同朋友仔就分開做咗做喇！

首先，有個staff同我講解我一陣做嘅係咩，用咩做，有咩效果等等。其實講咗都唔太清楚，因為啲名詞我唔識，不過個staff都好好人同好有禮貌。解釋咗一輪，就帶我去另一間房由又另一個staff開始幫我做脫毛喇！

不過，係做之前，佢會先幫我做皮膚測試，睇吓我會唔會敏感等等！好好彩，我又無事喎！yeah！開始做喇！

首先，佢會塗啲凍gel係腋下，戴眼罩，開始。一路吹啲凍風，一路用激光脫毛。都真係有啲痛架，好在係吹緊凍風咋，如果唔係仲痛呀！

每邊大約做咗十幾秒，咁就完成喇！佢話每次做，都會有2-3成係唔會再出返嚟！所以一個人平均做4-6次就會完全脫晒，永久無煩惱喇！

要永久無煩惱都係有代價嘅！如果我今日即confirm做埋2-4次，費用係10,000大元，明天或又後先決定做，就要付出15,000大元。嘩！好貴呀！如果中咗六合彩，我就會做嘅，否則，都係永久自己嚟喇！

好彩，我比朋友W早做完，當我等到佢出嚟嘅時候，佢個樣就寫住「好想join」的樣子，我梗係捉住佢快啲走人喇！唔俾佢亂嚟，因為太貴喇！而且佢就係怕會心軟所以要搵人一齊嚟，我梗係拉佢走喇！

哈哈！最尾，出咗門口，我哋就無返轉頭喇！其實有錢的確不妨做咗佢，可惜我係「一百萬人的故事」其中一個呢！

Today: Yesterday: