步走、暴晒@米埔

26 Oct 2008 (Sunday，晴)

我、chiu san同埋我公司嘅KT大人、美眉一齊去慈善步行，去米埔大步走呀。哈哈，好開心呀，我咁大個女第一次去米埔呀，所以好興奮呀！而且每個參加呢個大步走係都要搵500讚助，又做善事，又有得行，一舉兩得呀！

呢度啲風景真係好靚呀，靚到唔係好相信自己係喺香港呀，好外國feel呀！感覺好舒服，雖然好曬，好熱，烈日當空，成身汗呀，但勁好feel呀！

哈哈！係呢度以為自己係荒野、沼澤呀！哈哈，勁開心呀，我哋好似大鄉里出城咁，係呢個咁靚嘅大自然勁影相呀！

有時會有呢啲清幽小徑，好舒服架！不過好小昆蟲，我都好驚架！話說大會整個行程嘅原定時間係大約2小時，但我哋行咗2小時，因為掛住影相嘅關係，只係行咗無一半嘅路程，哈哈！唯有剩下嘅行程，行快少少喇！

除咗勁靚嘅大自然景色，好多好細緻嘅都好靚架！啲花，靚到好似假嘅一樣，仲有嘅好得意嘅果實，仲有好多好多，影咗好多呀，放唔晒上嚟呀！

雖然行得好慢，好攰，好熱，好曬，但一路行，美眉不停發笑彈，連chiu san都俾佢引得捧腹大笑，所以不經不覺3小時我哋就行畢整個行程喇！

平時唔做運動嘅我，行得都幾辛苦呀，但我好想再親親大自然，去行多啲呀！要計劃下次嘅大自然步走先得！