vychiu Wedding 之 媽媽鞋 及 細佬老西

今日約咗我屋企人去旺角搞埋佢哋啲衣飾，仲爭媽媽鞋及細佬老西。

我帶媽咪去我之前做鞋，係金都地下果間度度做，因為就算你大細腳都可以就返，對鞋著成日架MA，當然要C服啲。

我哋一家人加埋細佬古箏老師，一齊去睇咗鞋先，我哋揀下鞋形，揀下鞋踭形同高度，揀埋顏色同面料及鞋面裝飾，都算好順利咁搞掂咗啦。今個月20號有得攞鞋啦。

搞定咗媽媽鞋，就出發去兆萬睇細佬西裝。係兆萬，細佬覺得貴又唔係好啱，佢就帶我去荷李活購物中心，佢話果度仲多。我真係十年都唔出一次旺角，只係會有嘢做先出去，做完就走，好少行街，邊度有咩都唔知，於是就跟細佬去睇。

果然真係多好多，上到去差唔多成層都係。我哋行咗一個圈，細佬都好快手揀咗一間啲衫料感覺上靚啲嘅，有小小暗直紋嘅。度埋身，又搞掂，一個星期有得攞喇。

嘩！大成功，一晚KO咗兩個項目。

不過當時都九點幾十點喇，要去搵嘢食啦。我哋去咗上海街一間日本嘢度食石窩燒烏冬，之後就打道回府啦。

其實我已經好攰，返到沙田已經11點幾，我係一個唔夜得，要一早上床Hea嘅人，不過可以一日搞埋啲嘢，放下心頭大石就感覺安樂晒喇！