覆診

chiu san 尋日終於去覆診喇，係甩臼之來，第一次覆診。

chiu san自從甩臼位無痛之後，就無帶手托喇，因為佢覺得自己應付到，見佢之前同我去bbq無帶手托嘅相，仲以為佢好返添！

尋日覆診時，醫生叫佢要成日帶住個手托，因為怕個甩臼位埋得唔好，將來就會好易再甩。chiu san 聽到就更係嚇死，即刻話日日帶住個托喇！不過醫生仲話，以後要盡量避免踢波呢類咁嘅運動，我估呢類運動碰撞大，甩過嘅地方好易再甩。chiu san梗係唔開心喇，佢咁鐘意踢波，就等同如果我無咗把聲，叫我以後唔好唱歌一樣難受。醫生仲話，chiu san咁甩法，成舊骨向後移，佢啲肌肉撕裂得好厲害咁話，我聽到都覺得痛呀！

醫生今次敎chiu san做兩款康復嘅運動，一日做4次，每次做40下。之前個中醫朋友話，做呢類運動，係以防將來會有「肩周炎」咁話。今次chiu san就好乖咁做個乖病人，準時做運動。一定可以好快好返架！

覆完診之後，chiu san到而家都仲係好無心機，一來佢唔可以再踢波，二來佢好怕再甩臼，三來帶住個托，搞到佢背脊、左肩都痛埋，因為個托係借背脊、左肩嘅力去托住隻右手，等佢唔晒用力。搞到佢返工都做唔到嘢~ 唉~

其實，一定會好返嘅，雖然係唔係以踢潻，不過最緊要係健健康康，行得走得，就已經幸福過好多人喇！仲有呀，chiu san，我只想你開開心心，唔開心嘅事一定會過去嘅，好嘅唔好嘅事，我都會陪喺你身邊，一齊度過架！我支持你呀！加油呀！