查理仔飯局

尋日同查理仔飯局，果然佢同前男友分手後, 飯局即刻密咗。

其實查理仔今個月尾生日，諗住同佢食飯興祝一下，但今期又無錢，好彩查理仔唔介意食平嘢，去咗尖咀食米線。仲有，反而我無準備禮物俾佢，佢買咗化妝品俾我。我有啲唔好意思呢！我啲朋友就係咁架，個個都好鍚我，成日請我食飯，送嘢俾我，可能佢哋知我窮喇！

其實我哋只在乎傾下偈，食咩都無所謂嘅！我哋講吓佢，講吓我，仲講吓佢家姐。家姐今年年頭結婚，而家已經有咗5個幾月喇，BB下年年頭出世喇！好開心，我哋兩個仲話唔知幾時先好似家姐咁幸福添！尋晚真係傾得好開心，可惜佢係灰姑娘，九點就要走人，返屋企同媽咪報到。咁我都係時候返屋企同周公子報到喇！咁我哋約定下次再傾過。

走嘅時候，攞個電話出嚟，諗住同周公子報到之前，先向chiu san報到，點知一睇，兩個chiu san嘅miss call，平時我同啲friend去街，佢都唔會打俾我嘅，打返俾佢，先知原來佢唔舒服，話唔等我瞓先。(大家唔好誤會呀，平時chiu san係會等我返到我屋企先瞓得安心，我哋唔係一齊住架！) 但到最尾，佢都係等我返到屋企，佢先瞓！