堂細佬大婚

2008年1月5日(星期六)，係我堂細佬嘅大囍之日，好開心呀！我哋幾兄弟姊姐，佢係第一個成家立室呀！各人當然都好興奮喇！包括我。

滿以為今次細佬結婚，我可以舒舒服服咁以賓客身分參加婚宴，點知都要擔當化妝師一職。不過唔係全部化新娘。事緣，細佬媽咪，即係我嬸嬸，第一次當奶奶，當然好緊張喇！不過化妝師唔包佢喎，搞到佢唔知點好，我知道之後，梗係會出手相助喇，我嬸嬸不知幾開心。另外，新娘個化妝師又原來只跟一早同全晚，下晏去註冊又係唔包，但弟婦其又想下晏轉頭同補妝，於是我又要跟埋去，咁即係話，我由一早8:00開始差唔多跟到尾呀，又係賓客又係化妝師，好搞笑呀，仲好忙添！哈哈，因為我習慣咗係一邊幫頭幫尾，果日都係咁，不過好開心！

果日，我8:00去到嬸嬸屋企，幫嬸嬸化妝，佢哋好好人，知我未食早餐，整埋我果份，係一大碗雞奕义燒米粉，真豐富呀！

8:45，新郎哥同新娘子返嚟喇，一對新人返到屋企完來要食飯架，唔係係咩意頭呢。跟住當然唔少得叔叔嬸嬸飲茶儀式喇！最最最搞笑，個攝影哥哥聽到細佬叫我家姐，竟然叫我飲埋一份，當時我真係唔知點好，叔叔嬸嬸係咁叫我：「飲喇！飲喇！」咁我就榮升長輩去飲茶喇！叔叔嬸嬸臨時俾兩封道具利是我，封返俾一對新人。場面非常搞笑呀！

10:00出發去女家，因為要幫新娘子轉頭換衫，於是我又要跟新人返女家回門喇！去到女家，原來佢哋一早預備好飯盒供各人享用，真周到呀！除咗飯盒，當然唔少得金豬喇！各人用餐完畢，我又出動喇，幫新娘子補妝轉頭！

1:00又出發喇，出發去伊甸園註冊，哈哈，等進場，一對新人梗係勁影相喇！好開心好多人都讚新娘子個頭靚。yeah!

2:00進場註冊，好感動，佢哋係律師嘅，各親友嘅見證下，終於結成夫婦喇！註冊完，又繼續影相喇！都影都三點幾，chiu san放工過咗嚟搵我，於是我有個小休，同chiu san行開咗去食嘢。點知食咗一陣，電話又响喇！原來嬸嬸已經到咗酒樓，搵我幫佢換衫同set 頭。於是我同chiu san小聚完畢，我又趕返去酒樓"做嘢"。果陣4:00都未有呀！去到又極速咁set頭換衫，因為嬸嬸真係好心急呀！搞掂晒，嬸嬸由新娘房行出嚟，聽到一陣陣"嘩嘩"聲呀！個個都係嬸嬸咁大個女最靚今日，仲靚過嫁果陣喎，個個都搵佢影相呀，我細佬們(除咗結婚果個細佬，佢對下仲有未個細佬)見到佢，O晒咀，即刻要同佢影相呀！因為未見過媽咪咁靚喎！

我任務完成，我著住高根鞋企咗作日，終於可以坐吓喇！不一會，新郎哥細佬走埋嚟細細聲咁同我講，「原來化妝師唔包外母個頭髮！」WELL~ 無問題，等我嚟！終於搞掂晒，真係可以做返個賓客，周圍同人傾吓、玩吓！

席間，我同多年不見嘅表弟相認，因為太耐無見，大家都唔認得大家，不停咁上演一幕幕相認嘅鏡頭。好搞笑！同一班細佬妹勁玩勁笑，好開心。除咗我哋，我媽咪都好開心，因為叔叔請咗佢哋當年未娶未嫁時一班兄弟姊妹嚟飲！十幾廿年無見，佢哋係咁想當年，好好笑！

果晚真係好開心，雖然攰到抽晒根，但係係值得嘅！唔知下次到邊個呢？