深水埗一日遊

18 May  2008 (星期日)

呢日無無聊咁，chiu san問我今日去邊呀，我諗一諗，衝口而出一句「不如去深水埗行吓」就咁，我哋開始咗「深水埗自由行之旅」。可能有人問，去深水埗都好寫？無錯，因為我好少去，就算係都唔行得耐，所以好想去見識吓！

一落巴士，就見到深水埗郵局，做咗咁多年郵局，雖然至今已離開咗，但仍然有呢個無病，就係見到郵局仍然雀躍要去影相做留念。尤其係比較舊嘅局，好似呢間，我好鍾意佢個牌仔。

就係呢個，好舊，好正，佢舊到、細到幾乎唔會有人在乎或見到佢嘅存在，但我就喜歡。

轉入一個街口，給眼前嘅景象吸引，因為眼前嘅根本就似一條食街。正合我倆意，為食的我倆。

我哋揀咗呢一間，好香，真係忍唔住入走去食。 (PS: 嚟之前我哋已經食咗嘢！)

果然又真係好好食喎！呢個係chiu san嘅！蝦籽撈，雖好味，可惜chiu san去蝦蟹敏感，最後都係肚仔痛！可惜，下次無得再嚟食喇！

呢碟係我嘅，水餃撈，同樣好味呀！仲有蝦子添！正！

當然嚟深水埗，唔少得嚟黃金巡視吓業務喇，果然好多人，不過唔啱我哋行，好快就閃人喇！

下一站，係鴨寮街，我真係未嚟過架，好新奇呀，咩都有得賣架，玩具、零件、鑽地用品，總之有好多好多嘢睇喇！咁大個女總算見識過喇！

因為星期日嘅關係，好多舖頭都係無開，包括賣衫嘅！唉，唯有睇係四圍環境！又俾我發現咁大間當鋪喎，又會有咁多人攞嘢去當嘅？

總之呢度有好多好舊嘅嘢喇！

又無端端有間醫局喎，而家仲有醫局嘅？

中途經過一個好靚好大嘅公園，咁啱啲鳳凰木開花開得好靚呀！

行咗半日，終於見到嘅現代嘅嘢喇！就係起到好高嘅住宅，真係好高，同嘅舊嘅屋一齊，好一個新舊對比呀！

就咁，深水埗之旅就咁完喇，我哋咁就離開嘅個咁得意嘅地方喇！