又要返工又要返學嘅日子

尋日，開始咗我又要返工又要返學嘅日子，其實，第一堂係喺上個星期四已經上咗，不過果日我係放緊病假嘅情況下返學，感覺上無咁辛苦。至少我係瞓到黃朝白晏，又瞓埋晏覺先去返學，精神奕奕咁返學。

我返工，8:00返到中環，六點幾已經要起身，唉~所以我係長期唔夠瞓，都唔知咩鬼公司，要人返八點。其實工作量唔係好多呀，尋日，上晝好彩都得閑呀，諗住下晝5:45放工即走，趕去食個下午茶(要慢慢行，以免腰又痛吖嘛)，再行過金鐘返學，我返學果度，搭車去都係要行，因為啱啱係車站與車站之間，玩晒嘢呀！

不過，世事永遠唔會咁完美呀，5:00我老細打出嚟，話要即刻出個新聞稿喎，初初我諗都ok呀，仲有九個字先放工，一定搞得掂喇！我見隻稿得英文，咁無計喇，諗住俾新聞署譯中文喇！咁我就整memo，執好啲格式，準備俾新聞署，點知，大老細話要我哋個中文主任譯埋中文先俾新聞署。吓！唔係嘛，都唔知譯唔譯得切，大佬呀，我要返學呀！我就同我個AM講，我要返學呀，唔遲走得呀！我呢個AM真係好好人，其實唔係第一次架喇，我有事唔留得太夜，佢會叫我教佢做，叫我走先。尋晚又係，佢同我講，如果我放工前都未有，佢留後，由佢執埋啲手尾出俾新聞署。真係大感激呀！其實真係只有佢先會咁做呀，其它經理，就真係經過乜都唔理果隻喇！

好彩，好快就返咗個中文譯本，我就拿拿聲搞掂佢喇！俾埋大佬細簽名，點知老細係咁係度講電話，理都唔理我份嘢，佢唔簽，我出唔到架！我個AM都唔係咁熟，我想整埋先走呀！大人~

等到5:45，我正諗住交低俾我個AM之際，電話就係呢個時候響，玩咩，我知實係大老細打出嚟，咁就要聽埋喇！太好喇！佢話隻稿出得喇！最終我同個AM一齊搞掂咗喇！但我都係走先，留佢一個收尾真係有啲唔好意思，不過無計喇，真係唔該晒佢呀！

跟住我就去咗百味(日本拉面店)食咗個下午茶餐，好抵呀，HKD15有個雞扒飯，都OK架，食得太飽上堂會合眼瞓架。我食食吓發覺，原來無chiu san陪食飯，個感覺有啲

清涼，唔怪之得chiu san咁鍾意我同佢食完飯先返學喇，我而家明喇！辛苦晒chiu san呢兩三年成日都要一個人食完飯去趕返學呀！心中有點不忍chiu san成日一日人去應付沉重的讀書壓力，可惜我幫唔到佢！

跟住我就行過去金鐘，今次我行一條我未行過嘅路過去，好彩又俾我行到過去。YEAH!!!!! 襯仲有小小時間，去百佳買支水就返學喇！

其實上一堂，上完都唔知聽到啲咩，我係咁架喇，小時候返學都係咁，上親呢啲學術性嘅嘢，就係唔入腦，好彩MISS有重溫上堂嘅嘢，咁就好好多呀！

今次，真係有合晒眼瞓呀！但我因為唔係好舒服，

又喉痛、又流鼻水、又咳、張椅太高搞到我吊晒腳，同埋腰都痛埋，所以瞓唔著，仲周身郁，因為唔知點坐先舒服啲，我身邊兩個同學真係多得我唔少呀！哈哈！

幾經辛苦(加上唔係好明miss講咩)，終於都放學，尋日最期待就係呢一刻，因為chiu san尋日又要返學，佢放學之後嚟接我

，一齊去坐船坐火車。我哋仲係尖咀嘅麥記食咗個夜宵

添。

好似好充實嘅一天，咁又過咗喇！