不愉快的星期六~~by vy

上個星期六，我都仲未病好，但因為一早約咗個準新娘去試妝，咁病都要去架喇，何況化新娘妝係我最鐘意做嘅事。

本來約咗6:30係尖沙咀試，佢6:30先打嚟話要遲啲到，啱啱先放工，唉~ 咁無計，咪叫佢快啲嚟囉。佢差唔多7:20分先到，真係大失預算呀！佢去到尖咀話唔識路，諗住問佢喺邊度，着咩色衫，去接佢喇，佢又發晒脾器咁，都唔知佢想點，地址佢一早就知架喇，又話呢樣又話果樣，唉~ 搞到差唔多7:30先開始化。

遲咗成個鐘，梗係要更加快手喇！一開始，諗住先試褂妝頭，問佢想點整，佢話唔知呀，我問佢係咪要淡淡的，自然嘅，佢話係。好呀，都預咗佢答咩都唔知架喇，大部分都係唔知自己要咩架喇。咁我咪化個淡淡嘅妝俾佢先囉！

其實大家都明白，唔係所有新娘都好似medol咁靚架，因為係女孩子都會做新娘架喇，所以我從來都唔會嫌個女仔難唔難化，而且待嫁嘅女孩子係最美嘅！

可惜，我第一次覺得佢唔靚，點解？化到差唔多成個妝嘅尾聲，即係對眼，佢本身唔係話好精靈果隻，有少少腫，本來淡淡嘅黃色，已經好靚(我覺得喇)，佢本來都無意見，點知佢老公個家姐，一行埋嚟，就豪不客氣，勁串咁講一句「嘩！唔得呀，無色嘅！」我解釋俾佢哋知，日妝係淡淡哋，佢又話要自然，所以咪咁化囉！佢家姐又話「都無理由淡成咁！」我無好氣呀，而家都唔興成塊面七彩喇，咁娘，咁問佢想要咩色又唔知，同佢解釋佢唔用得粉紅呀，紫呀咁，又唔出聲。唉~ 幫佢轉色都轉咗六、七次，最後都係要鮮黃鮮綠。即係老遠都知你化咗眼影個隻。其實佢唔係話眼耳口鼻都好靚嘅女仔，咁當然唔會想好突出去化唔太靚嘅地方，佢又話要好紅嘅面，要我加紅佢。又嫌我隻唇膏唔夠紅，又唔同我講，佢哋自己係度話當日唔用我啲唇膏咁話！

都算喇！我已經好辛苦喇！既然同意咗隻眼，就set 埋個頭喇，著褂，係要比較端莊，咁我又幫佢set 晒一頭長髮上去，佢自己婚妙都方便啲。其實set完都預咗佢唔鐘意，再等佢俾意見喇！問佢邊度唔好呀，其實點呀？佢又唔出聲，俾書佢睇，都搵唔到佢想要嘅！我又不停set咗5-6個俾佢睇，無一款鐘意！又係黑晒面咁！唉！又話要放啲落嚟遮包包面，放咗落嚟又話放落嚟唔放便著褂，又呢樣又果樣，全程黑面。後來佢搵到雜誌有張相，叫我整。我一睇，果個係周文奇呀！人家名模呀，set 咩都靚架喇！而且呢個頭我都啱啱先幫佢整完佢話「唔得」架！咁我就同佢講，呢個佢唔會有咁嘅效果，亦唔會遮到佢個包包面。佢大不滿，面更黑。唉！我都想面黑呀！不過我無，仍然友善地問佢想點呀？唔知佢係咪聾嘅，又或者係啞嘅！全無反應。最後好難先完成。因為佢哋餓喇，要食嘢，走人，我先收工！唉~ 終於收工。

我真係好唔開心，我鐘意做新娘，唔係淨係為咗錢，仲有我係好想用我嘅專業，去令一個女仔靚靚咁出嫁，開開心心咁！呢啲係錢買唔到架！今次，我仍然用為佢化一個合適佢嘅妝容，你唔鐘意唔緊要，我明白唔係個個makeup artist都同個新娘子夾得嚟架ma，如果唔係就唔使試妝喇！不過，佢哋唔係好識專重別人，一唔鐘意就「好唔得！」，又或者吱吱雜雜咁聲，我都忍你，可能我係我嘅錯，我唔夠技術。但今次我又唔覺我化得佢唔好呀！一個褂妝頭，同咗我兩個半鐘。唉~

好彩佢無即日confirm我，我諗我都唔會接架喇！我都唔想佢嫁都唔開心呀！其實當時我真係覺得佢唔靚。可能佢全程面黑嘅關係喇~ 不過，呢幾日我睇返啲相，其實佢都係幾甜嘅(化妝後)。其實靚唔靚係內心嘅！唔靚唔梗要呀，你笑，一定係令人歡喜嘅！

化完呢一個job，我一路行返屋企一路喊！好彩已夜深，無乜人！一來，我病到七彩都走去化，己經好攰；二來，我好怕真係我唔夠好，令佢咁唔開心；三來，我又唔覺得我真係差到如此地步呀。總之好傷心呀！

果晚仲半夜醒咗瞓唔返添！唉~咁大個女，第一次咁樣呀！佢張相，我唔post出嚟喇，因為佢都唔鐘意！不過我俾我啲朋友，屋企人睇！佢哋話我都唔係化得差喎！過咗兩三日，心情先平靜下來。

我係咪太認真呢？好似係一件好小嘅事，我唔開心咗兩三日。不過，我會繼續努力，為所有搵我幫手嘅準新娘開開心心咁出嫁架。