Chiu san 長洲開心生日一天遊 第三回

我哋係長洲街市附近，眼利嘅我，俾我發現咗長洲郵政局喎！好開心，一支箭咁衝埋去影相，無計，職業病，一見郵局就會衝埋去，仲要係平時好日都唔會見到嘅郵局！一場嚟到梗係留個念喇！

個郵筒仲有「ER」字樣加，我都係鐘意英皇室logo多過而家隻雀囉！

長洲呢個路窄嘅地方，郵差叔叔就係用單車去幫手每家每戶咁去派信喇，唔知點解，咁樣派信，總覺得人情味更濃呀！

呢間HSBC就真係夠掂呀！銀行仲要緊舊outlook(而家多數都裝修到銀灰)不在話下，連個頂都係瓦片嚟嘅，喺香港我諗真係碩果僅存。

途中，係某雜貨店，俾我哋見到..........

chiu san最愛嘅懶懶毛毛公仔拖鞋......

仲有我細妹最愛嘅鴨仔毛毛鞋 (鴨仔嘅product又係碩果僅存呀！).....

同埋我最愛嘅kitty添！

不過我哋就無買到，因為都唔知真定假嘅，所以拍個照留念就算喇！睇吓都好開心喇！

因為係平日嘅關係，無乜遊人，呢日長洲真係好平靜，好正！

chiu san身後面嘅茶座，係甜品屋嚟架，就係平時我最愛食嘅芒果米糍嘅出處呀！好好味架！我同chiu san一人買咗半打返屋企呀！

我相信，天后宮應該都係景點之一呀！

呢度條條街都好似差唔多咁，都係細細條，好難認呀！好彩長洲真係超細，唔會迷路！

初時見到呢個招牌，都唔知邊邊讀起好，研究咗一陣，我諗應該係「白米鹽務火水」！

係陸上嘅快艇呀！

經過一間中學嘅操場，學生都在上課中，操場一個人都無，就係有一隻晒太陽中嘅貓貓，我哋走入去影佢，佢好機警咁望住我哋。

chiu san怕嚇襯佢，行埋一邊睇佢呀，可惜佢已經俾我吵醒咗！

下回，我哋去東灣出發喇！..............