我的驕傲 ── 我的寶貝細佬

我的寶貝細佬，跟我年紀相差很遠，佢而家先至中五，今年會考呀，現正模擬考試中呀，很忙很忙，只見佢半前多前已經日日做past paper，仲做到早至八幾年嘅，看來佢對自己嘅要求很高。

但佢每年都有參加校際音樂節，佢係古箏高手呀(八級喎，仲唔係高手？我認為，哈哈哈)，今年亦不例外，學校老師們都因為佢哋係今年應屆會考生，所以不替佢哋報名，不準佢哋出賽，要專心溫書，但可惜佢同佢一啲同學仔堅持出賽，私下自己去報名，哈哈，又俾佢哋報到喎，但比賽日期就差啲喇，係模擬考試期間舉行。

尋日，BB(我細佬嘅暱稱)早上要返學校考試，下晝要趕去比賽，好辛苦呀，因為近日又要溫書，又要應付比賽，心神一定分散了些，佢對今次比賽不抱太大期望呀！

尋日放工返到屋企，見BB瞓咗覺，太攰喇，問唔到佢嘅戰績，見枱頭有分紙喎，快啲睇下先！

講真，睇頭四行都無乜反應，因為平時佢古箏老師都有講佢呢啲問題，好正常吖！睇埋最尾果兩行，我好驚訝，比比吓賽斷弦！但淨睇分紙都唔係好知咩事，即刻走去問陪佢出賽嘅媽咪發生咩事。

媽咪；係呀，斷咗弦呀，彈唔夠三分一就斷咗喇！

講到呢度，我心裏有一陣心痛嘅感覺。

媽咪；佢當時都呆咗一刻呀，太突然，佢望一望評判，評判無指示，佢就決定繼續彈，不過根本就彈唔到，佢無理照彈，直至完成全首曲。不過我都覺徥佢好叻仔。

唔好話媽咪呀，我聽到都覺得佢好叻，處變不驚。

媽咪；佢最後得第四呀！如果唔係斷弦.........

我又一陣心痛，心諗如果唔斷弦第一喇！不過呢啲係天意，你永遠估唔到佢幾時會斷架嘛！但又為佢感到驕傲，佢大個仔喇，處事得體，唔會慌失失喇，見評判斷弦都俾咁高分，就知佢係得架喇！80分以上就係頭三名喇！

BB，我知你好失望，但斷弦真係唔係你的控制內，借評判一句「繼續努力，下次爭取更好成績」希望你將來會成為一個出色嘅古箏大師，將自己嘅興趣發揚光大！做家姐嘅永遠都支持你！以你為榮！