年初一

近幾年，媽咪鐘意新年大年初一第一餐要去食齋，又唔知係喺邊聽返嚟，但同佢嘅信仰無關，因為佢係信日本教嘅，同道教、佛教係一啲關係都無嘅！但佢鐘意，無計，都要一齊去，一年都係一次姐。不過每年嘅年初一第一餐總係好晏先食，因為佢哋鐘意好晏先起身，等媽咪起身，都11、12點，仲要等佢出旺角埋去佢個教會出席儀式，先再入粉嶺食齋，加上今年勁多人食齋，2點先開始食呀！

所以，明知佢哋咁晏，我都精架，一早去chiu san屋企拜年先，話晒未來老爺奶奶喎，一早去都應該吖，本來諗住第一個同媽咪拜年先架，可惜我出門口佢都未起身！無計！向未來老爺奶奶拜完年，就趕去粉嶺會合我家人，但太多人，要食2點果轉，加上安排混亂，成2:30先有得食，搞到細佬胃都痛埋。希望下年佢哋可以早啲身，咁大家都好啲囉！

好食完齋，都成3點幾喇，我又要趕去馬鞍山chiu san嫲嫲屋企拜年，老人家一定要去探吓架嘛，好彩我又及時趕到去，chiu san一家都仲未走。坐咗一陣，大約半個鐘喇，我同chiu san又要去我屋企拜年，於是又趕去沙田圍，同我媽咪拜年喇！係咪好趕呢！

係我屋企又坐咗半個鐘左右，已經6點喇，又要出發喇，今次係尾站，chiu san婆婆屋企！

chiu san好少同婆婆影相，我梗叫佢同婆婆影吓相喇！婆婆聽到好開心呀，即刻去梳頭照鏡呀，梗係喇，孫仔同自己影相，一定開心嘅！

我當然唔執輸喇！

席間，婆婆攞嘅珍藏出嚟俾大家睇，完來係佢哋一家人唔同時期嘅相呀，遠至chiu san媽咪未嫁嘅都有呀，令我哋睇得好開心呀！你睇chiu san幾興奮！

仲俾我哋發現呢一張舊相，你哋估吓邊個係chiu san？