好似無放過假嘅星期六、日 (星期六篇)

2007年12月15日 (星期六)

我三嬸下個月娶新抱喇，即係我細佬娶老婆呀，好開心呀！三嬸一直為自己做新奶奶大為緊要呀！上個星期得知佢唔知搵邊個幫佢set 頭，於是我第一時間話我幫佢。細佬大日子，幫得幾多就幾多喇！三嬸又緊張得滯，想試下先，於是約星期六試頭，大家都放假吖嘛。

本來諗住9:00起身，同媽咪食埋早餐，執返嘅眼耳口鼻先出發。點知，chiu san打嚟叫我起身，已經9:30喇！唯有唔化妝，九秒九出門口，同媽咪食埋早餐，本來約咗11:00三嬸粉嶺嘅屋企，我都遲咗15分鐘。

太耐無上佢屋企喇，感覺好似返返去細個咁，只係我人大咗，覺得間屋細咗，好得意呀！有一樣無變嘅係，三嬸依然當我係小朋友，無計，係大人心目中，我哋永遠都係細路仔。

幫佢set咗幾個頭，俾佢揀，佢好開心呀，佢覺得我set得好呀！我仲幫佢幫埋鞋、耳環、同頸鍊，因為佢第一次做喜事呀，而且一屋都係男的(佢生三個都係仔呀)，咩都唔知架，我幫人做喜事做得多，唔多唔少都見得多啲，一次過幫佢襯晒啲衣飾，佢好開心呀。

跟住我哋去飲茶，三嬸話做東喎，我當然唔客氣喇！我細路女嚟之嘛！哈哈哈！飲吓傾吓，我哋又發現三嬸仲有啲嘢未買，於是飲完茶，陪佢去買埋！嘩！佢成個人鬆晒呀！因為之前唔知着乜呀，點配襯呀果啲嘢，我一次過幫佢搞掂晒。我都好開心架，可以幫到佢哋！

搞吓搞吓！都成差唔多三點，我就走喇！跟住就去chiu san屋企喇！做個伴讀書童呀！原來咁搞一搞，都好攰架！唯有一路伴讀，一路瞓覺，精神上支持佢喇！