公司有外星怪物呀

今朝一早，俾隻外星怪物激親呀！

嗰隻外星怪物雖然係同我係同一section，但唔同team，仲要係唔同office 坐，職位不比我高嘅一位入DATA嘅男同事。一路以嚟，隻外星怪物不時會走上嚟，有時係工事，有時係私事(找人傾偈)喇，不過好多時，佢一早上嚟，仲要係講無聊嘢，無聊程度極高。仲要聲大無準呀！講吓返大陸玩呀，見過咩靚女呀，等等，基本上有唔熟嘅人係度都唔應該講嘅話題，佢都講晒，更何況佢講嘅，更加唔應該係女同事面前講。而且好騷擾一早要返嚟做嘢嘅同事，至少好騷擾我。

我一路以來都無話過佢，因為我係正常人，而佢係地球之外嘅外星怪物，無謂同怪物講嘢，會覺自己口臭。

今朝，我同兩個同事係我個位度傾偈，三個女仔，唔理大聲講定細聲講都係會大聲笑架喇！我哋的確係大聲咗少少，突然有人“薯”我哋，即刻靜晒，因為我唔知邊個“薯”，仲以係邊個老細，一秒都無，隻外星怪物就加多一句：「好嘈呀！」我真係無名火起呀，你咩身份地位呀，三個女仔我最底職位，其中一個仲要係經理嚟添，隻怪物仲要係不比我高嘅，我覺得佢好無禮貌，仲要一時唔偷雞走去學人做保長話我哋。搞到其中一個較新嘅同事即刻閃人。雖然我哋係講無謂嘢，但佢絕對無資格話我哋！

我唔係想用人工高底、職責輕重去睇一個人，我細細個就學會「職業係無分貴賤」嘅道理，因為每一個職位都係重要嘅，缺一不可，但呢隻咁嘅嘢，實在從來都唔識咩叫尊重，佢唔係唔識尊重人哋，而係唔識尊重自己，因為要別人尊重自己必先尊重別人。

我同另一個同事之後更係嘈喇！佢咩事先，識話人唔識話自己，不知所為。而且呢隻外星怪物已經得罪咗我呢個惡女人，佢下次上嚟再有啲咩不啱，我一定唔客氣全力話佢。因為，我已經覺得我無須再忍啲唔係人嘅怪物。

我之後即刻同chiu san講喇，chiu san同我講「海納百川，有容乃大」，真係好句呀！不過海係地球嘅寶庫，佢能容納嘅，都係地球上嘅川河，但容量幾大都容不下外來物體！哈哈！呢句說話被我講成咁，係咪激死呢！但果一刻，我實在容不下去了。我忍佢太忍喇！

寫咗出嚟，心情好了！再有下次，我會同佢講，「快點回火星吧！」哈哈，講笑咋！