初二，一早起身，8點入到上水會合chiu san同佢屋企人，準備上大陸玩返兩三日喇！
其實唔係第一次上去玩架喇，不過未介紹過！而今次我哋坐皇巴，之前未試過架！好興奮，成個大鄉里咁呀！
原來坐皇巴，係喺皇崗先上車，跟住佢會俾張票你，等你到咗關口，過咗關，又上返皇巴時佢會收返你張票，就會到達車站喇！
過完關再等上皇巴時，chiu san好興奮呀，仲興奮到跳跳吓添！有片為証呀，chiu 爸都睇唔過眼呀！
落咗皇巴，即刻走去買車票上去喇，目的地，番禺祈福新村！出發！
經過2小時嘅車程，終於到喇，係祈福車站落車，呢度都幾乾淨，幾骨子架！
我哋就係坐綠色果架車喇！
坐咗兩個鐘，chiu san勁攰呀！
呢度都ok凍架！所以我哋做保暖措施！
我哋第一站，未返屋企放底嘢住，因為肚仔餓，去醫肚先！我哋去祈福藥膳坊，好味又健康！
醫完肚，返屋企放低啲細軟，又出發去祈福隔離嘅市橋行吓喇！今次我哋去好又多行，大家見唔見到張相左邊有個「好又多」字樣？因為唔記得影相，走時坐車先記得影，所以影得咁差喇！
「好又多」應該係一個商場，裏面有一間好大嘅超市，我好鐘意行呢啲超市，一來大到咩都有得睇，二來有好多大陸嘢，好新奇，三來有啲嘢好平，例如1蚊1盒紙包飲品，有啲都唔錯架！
我哋仲係呢度食埋dinner，係自助餐，只係30蚊，雖然唔係好多嘢食，又唔係貴嘢，但有pizza不停出，食到你食唔落為止，好抵食呀！食到好飽呀！
食完飯，返祈福喇。係祈福，我好鐘意佢一樣嘢，就係有一塊地，係俾人放煙花爆竹架！我上上年有睇過人玩，覺得好有新年氣氛，所以今年一定要再嚟！
果啲大煙花，就好似維港初二放果啲咁大，可惜我哋乜都影唔到，掛住「嘩！」大煙花，太貴，我哋玩唔起，但又想玩吓喎，於是買咗啲小朋友玩嘅嚟玩吓先！
係屋企露台玩，我哋都玩得好開心架！
初二行程就到呢度喇！初三繼續！
有碟餸.......係腐乳喎，咁都算.........
回覆刪除[版主回覆02/12/2008 13:56:00]無腐乳喎，有酸甜炸豆腐同埋焗甜薯，可能我影得太差喇！
好好玩咁！由祈福點去市橋？記得上次兩日一夜去番禺住祈福新邨的酒店，第一天去動物園、看馬戲及在祈福新邨附近的食街吃飯，第二天在祈福新邨左走走、右逛逛，唔知仲有乜地方可去。
回覆刪除巿橋有咩行呢？或者附近有何地方推介好讓我下次再去玩呢？感覺你年年都去祈福喎......
仲有問題，上次我是坐船去番禺，你坐車去條路點走？車費大約是多少呢？
今日係公司勁悶......
[版主回覆02/12/2008 17:03:00]我次次去番禺都係坐車呀，有識過坐直通車，係上水火車站附近有，唔記得幾錢，100左右，如果係深圳上去，平啲架，60蚊。
好似今次咁，係皇崗過咗大陸關，就有售票嘅地方，車就泊係售票處對面，搵返啱架車，上咗去就直達祈福喇！
簡單啲，係羅湖過關，向左行，會有車場，又係搵售票處(售票處在車場)，買票上車直達。
不過最最簡單，都係上水坐直通巴士。巴士站係火車站隔離，最好之前打電話訂票先，以免去到先知無位。你去嘅時候再問我喇！
至於市橋，其實喺祈福巴士站，得有一架公車，係1號，係出市橋嘅。出市橋我係想行吓睇吓香港無嘅嘢，行超市最開心，因為有書喇，電器，熟食，總之就超大，真係有排行，只不過唔啱香港人，但係我睇吓都好開心呀！買零食最開心，有啲真係好平，1蚊盒紙包飲品，勁爽呀！
我都好想玩煙花呀~~~~
回覆刪除[版主回覆02/13/2008 12:10:00]我都係好想好煙火，先嚷着要返大陸咋，新年係大陸，係有氣氛多小小。