第一天 - 日本東京 - 新宿自由行 (24/4/2007)

2007年4月24日，下午1:30，終於到達成田機場；
終於腳踏日本喇，影返張相為證先。

我哋懷住興奮而又緊張嘅心情，以9秒9嘅速度，飛去過關，好彩唔係好多人，以極速過關成功，跟住半跑半行咁走去JR售票處買3500日元嘅呢 set N'EX優惠車票，(包一張成田去新宿駅嘅Narita Express車票同埋一張儲值卡[內附1500可用額及500按金])，仲可以趕得切去坐2:13班車添(真係好準時開車架)，勁快呀！

我哋就係喺呢個月台上車喇！

我哋就係坐呢架車喇，好緊張呀！出發喇！

經過一小時多啲啲嘅時間，終於到在我最喜愛嘅地方──新宿，第一次企係新宿JR駅，好興奮呀！

雖然我一早已經知道我地要係西口出先至最近我哋住果間[新宿太子]，但係我哋又無厘頭咁係呢條電梯出，上咗南口，結果搵餐死，又要落返月台，再找上西口嘅電梯。大家記住係月台睇清楚乜野口先好出，否則搵餐死都唔會搵到你要去果個出口架！

幾經努力，終於搵到間[新宿太子]，其實好易去，只係我哋太心急，搞到自己亂晒。

你哋睇下間房幾細，不過是但喇，有地方瞓就得喇，跟住落嚟幾日，加埋都唔知有無24小時係間房度。

我最鍾意係我哋間房個景，係個窗望出去，嘩！係呢個時候，已愛上新宿喇！

即刻落返去欣賞迷人的新宿！
過咗馬路就係新宿駅西口大黑屋。

我哋就係新宿駅西口嘅大黑屋買迪士尼飛，2張11,100，平過係迪士尼買呀！睇我咁得戚就知已經買完喇！

經過4個小時嘅飛機，個多小時嘅車程，係時候肚餓喇！
5:00我哋去咗新宿西口附近，[澤俱樂部]食壽司。真係好好味架，食到停唔到口呀！o~i~si~由其係紫色有兩舊果碟呀，正到呢~~~

食完壽司，一出門口就見到一間好大嘅藥房(下圖我手指住的，有兩層高㗎)，二話不說，我就走咗入去，掃咗1.5萬元化妝品，當然係日元喇！嘻嘻！

食胞胞，買完我嘅必需品，開始周圍行吓，好靚呀~啲五光十色嘅夜景。
唔好睇我擺晒post咁，其實我係好凍，一入夜，真係好涼架。

嘩！有間SEGA，有得夾公仔呀，即刻去夾，嘩！勁呀，一夾就夾到喇，呢隻係我哋第一樣夾公仔嘅戰利品，好開心呀！係日本，呢隻熊仔好HIT架，周街都有得夾架。但就係搵唔到傳說中周街都有得夾嘅，兼且係我至愛嘅Hello Kitty！好失望

  

仲未完架，待續....