第一天 - 日本東京 - 新宿自由行 (24/4/2007) 下集

跟住我地繼續喺新宿四圍行，由西口行返去東口果邊，東口係熱鬧好多，好多人，好多打扮到靚靚嘅日本妹(本身靚唔靚就見人見致喇，不過佢哋真係打扮到一絲不苟，佩服)，OL又有，妹妹仔又有，淨係睇佢地嘅打扮都有排睇，又去咗歌舞伎町，呢度比想像中好呀，睇落都唔係好複雜呀，本身都有OL入去架，仲俾我哋喺呢度搵到一間有Hello Kitty夾嘅舖頭，我哋當然不甘後人，夾咗兩隻走喇！

不過個天不停咁落雨，時大時細咁，又要睇地圖，又要搵我哋一早預定要去嘅shop，於是無法分心去影多啲相，而家諗返，有啲可惜~~~

喺新宿，有好多波子機舖，又真係有好多人喺入面玩，不過我哋無入去參觀，因為入面好嘈，可能因為啲波子機太多喇~~~~呢間係喺酒店附近的，都幾大間吓架！

我哋嘅節目，離唔開Shopping，行吓行吓，成10點幾喇，啲舖頭真係閂得八八九九，無得Shopping，又係時候搵野食，呢間係行到去，咁啱肚餓就行咗入去食喇！

睇吓個餐牌先

我哋叫咗餃子.....

....同兩碗拉麵

好開心呀，係日本第一碗拉麵呀！果然係好味啲呀！

食飽無嘢好行，返酒店之前，去便利店買咗宵夜同飲品，就返酒店休息喇！
我哋第一晚嘅宵夜......，加入熱水3分鍾就吃得，不過就好普通囉~

係時候影吓我哋第一天嘅戰利品喇

時間過得真快，第一天嘅行程就咁完咗喇，係時候休息喇(雖然百般唔願去瞓)，準備為第二日嘅行程充電喇！