學咗有3個月喇

唔經唔覺，由24/1/2007開始，我係Plokadot Professional Nail Ltd.學指甲，到而家都讀咗3個幾月喇， 時間過得真係快。

仲記得最初學美甲， 純粹為咗幫人make up時，仲可以做埋指甲，可以搵多啲錢。學到而家，唔單只想賺多啲錢咁簡單，亦變咗自己嘅興趣，而家幫自己做甲，做到靚一靚咁，好開心架。

呢個課程，就嚟讀完喇，好唔捨得，我覺得呢度個miss好好人，同學仔又好夾，上堂都係喺一片快樂嘅氣氛下進行，又學到我想學嘅嘢，我真係好鍾意喺呢度學指甲。

而且我覺得miss教我哋嘅技術一啲都唔馬虎，好professional，師資優良，自然有優良出品

。點解我咁講？之前喺街見到啲美甲店，佢哋做gel甲做得好快，個多小時就搞掂一對手，仲貼埋石，我自己就要做2個鐘，仲係無花個種，以為自己好唔掂喇。點知，有個同學仔上個月結婚，就唔到時間自己做甲或叫同學仔幫佢做，於是出咗去果啲美甲店到做，佢真係做咗2小時咋，收$380，仲有石架，不過呢，隻甲厚到嚇死人，又完全無指甲嘅弧度，就好似一個枕頭咁，太差了，我個同學仔都好唔滿意，但無計，根本無時間拆，返到學校俾我哋睇，我哋都嚇咗一大跳，咁樣嘅效果，我一定唔會介紹朋友去做。

其實人哋做得好唔好都唔敢評論人，我又唔係評審，更加唔係想喺度唱衰其它人，各人有各人嘅做法，可能有啲客人鍾意咁呢。但我一定唔係咁做，會跟足miss嘅教導同要求，雖然唔會好似人哋咁快，但步驟做足，有咁多步驟就會用多啲時間，真材實料嘛，唔用cheap料，做出嚟真係似足日本美甲雜誌果啲架。好多同事都話我整自己都整得好靚，好開心呀。真係要多謝miss嘅指導，唔係幫佢賣廣告，但佢真係好好人。

雖然我而家都學咗gel甲同水晶甲，但仍然想繼續學落去，因為nail art同make up 一樣，都係藝術嘅一種，博大精深，學得多，先會更出色。不過，好貴呢。呢個course都使咗成13000喇，又要儲過喇，而家真係好窮呢(又啱啱去完日本呢，我去日本時我自己都有做甲先過去呀，以免自己喺日本變咗薯仔ma)

。我會加油架！

今日仲俾我搵到個好地方買nail art嘅書添呀！！！！

聽講平啲架！！

童年夢地址：香港九龍旺角西洋菜街2T-2U添置商業中心一樓全層

(即旺角地鐵站D or E出口，中南書局側，近家樂商場，信和後面條街)

電話: (852)2482 4482, 2626 0464
傳真: (852)2486 2000