第四天 - 日本東京 - 築地 上野 淺草 秋葉原 (27/4/2007) 之二

好，下一站[上野]。

對於我地兩個嚟講，[上野]除咗多零食買之外，呢個地方都無乜特別嘢吸引到我哋！

咁我哋又要買飛，都係搭[都營鐵路]由[築地]去[上野]。

我地張地鐵飛呀！出咗閘就會無咗架喇！飛上票只有出發地點同埋票價，只係票價以內嘅駅出閘就可以。所以買飛之前睇清楚自己要去嘅駅所需幾多錢！

呢架就係[都營地鐵]喇！

chiu san有啲口渴，買吓嘢飲先！(係地鐵駅內)


到咗[上野]喇！我哋係[上野卸徒町]駅落車，上咗地面，就係呢條橋。

係橋嘅右手面，就係呢條街，睇吓咁出名嘅[上野]有咩睇先！

只係啲波子機店同埋賣貴價洋貨！好似唔係咁啱我哋行咁喎！
又行吓行吓，嚟到呢兩條街，旅遊書都有介紹過，應該會多啲嘢睇，快啲行下先！

果然多啲嘢睇喎！有好多糧食，有特色啲咁。仲有咁大粒嘅八爪魚丸添！不過我哋無食到！

行行吓俾我哋見到有士多啤梨食，諗都唔諗，買嚟食先！你睇我隔離個哥哥仔，睥住我，大概係咁諗：「士多啤梨之嘛，咁都影！前世未食過咩，唔使咁開呀！一定係大鄉里喇！」呀！俾人識穿咗我係大鄉里添！不過佢估中咗喎，我真係未食過咁多汁嘅士多啤梨喎！諗起而家食唔返咁甜咁多汁嘅士多梨，有啲想喊呢！


[上野]同[新宿]嘅景真係好唔同架，我都係鐘意[新宿]多啲~

咦～有間U2喎！不過此U2不同彼U2，呢間同香港嘅無關係架，只係咁啱又係叫U2咋！呢間賣啲嘢潮好多架！

嘩！終於俾我見到HELLO KITTY扭旦喇！扭返隻先！嘩！個旦都有KITTY個樣架！好嘢！

我哋嚟[上野]，都係為咗買零食。終於到搵到[二木之菓子]喇！買呀！

買完零食，走人，搭返都營地鐵！張飛係入閘嘅時候，會打咗個孔。其實我都唔知點解要打孔

係地鐵，每卡車嘅頭或尾，都有[優先席]俾有需要人士，因為我哋搭車嘅時候，成卡車都無十個人，所以我哋可以坐任優先席呢~~~

好，向下一個目的地出發~~~~~