第六天 - 日本東京 - 東京 成田機場 香港 (29/4/2007)

終於都嚟到日本之旅嘅最後一日喇，我哋係呢間五星級豪華酒店瞓咗一晚，加上自己已經攰到不得之了，第二朝舒服到唔舒得起身，但始終都要起身喇，因為10:30酒店有巴士載我哋去機場。

一起身，俾眼前嘅景象吸引住，嘩~原來我哋間房對住嘅係一個一望無際嘅海呀，嘩~人都癲呀，靚到無法形容呀，一片藍天碧海，咁大個女真係第一次見。(只係我見識少

)

望落去酒店地下，一片園林美景，好舒服呀！


望過啲，就有啲酒店設施，環境優美呀！

個泳池正到呢~~~不過唔好睇出面陽光普照，其實好凍，絕對游唔到水架。

睇睇吓，另一邊有舊雲喎！

噢~~唔係雲嚟架，原來係富士山呀!!!!!哈哈，我哋真係好彩呀，無去富士山都可以睇到富士山，賺晒喇!!!!!

梳洗一番之後，落去食早餐，免費嘅，好多日本人係度食呀，因為佢哋多數都係喺度住一晚，食完早餐之後，就去迪士尼玩，所以好多人呀！食完，我哋再周圍行吓(只限酒店內，因為出面好涼)，呢度有個教堂仔，俾啲新人喺度行禮架，我都有想像過將來我同chiu san喺度行禮嘅情況，哈哈，好感人呀！但無可能喇！日本太遠喇！

參觀完，就搭巴士去成田喇，我哋係坐港龍機15:30起飛。

去到機場，又周圍行，仲有幾千日元，梗係唔放過任何shopping嘅機會喇。又俾我發現好多hello kitty嘅限定版，掃咗少少咁喇，又買咗啲草餅咁喇，嘻嘻！滿載而歸！諗起我哋仲未食晏，於是去搵嘢食，我哋去咗一間可以面對停機坪嘅餐廳。好失落咁食埋我哋喺日本最後一餐。

點解咁快最後一餐！我唔走呀！
呢碗係我嘅，我堅持，我堅持最後一餐都要食拉麵。

chiu san食意粉~~~超細碟，佢一早應該同我一樣堅持，咪唔會咁細碟囉。

日本最係一張相照。笑吓喇....不過真係好唔拾得同埋好攰呀~~~~~

上咗機喇，今次真係要走喇.....


飛起咗喇，回望日本國土呀，好唔捨得呀，淚水就快要走出嚟喇！


就咁，日本就咁慢慢我我嘅視線範圍消失喇.........

呢個就係我哋旅程嘅最後一幕喇，港龍飛機餐一份。