天氣變幻無常

呢幾日，天氣變幻莫測，唔知點解，公公嘅病程亦好似跟天氣而變化，各人嘅心情亦因此起伏不定。就如四舅父所言，大家嘅心情就像過山車一樣，突然升得好高，又可以突然跌到好低。

前兩日太陽普照，公公精神也不錯，今天下起大雨，公公嘅身體情況就變得好唔理想。個天真係識得同大家開玩笑。

今日放學，去到威院已經夜晚11點幾，但我真係好想去睇吓公公，所以去睇咗一陣，我就走喇。見到昭昭嘅神態，我知佢好心痛，我都好心痛，其實我想係昭昭唔開心嘅時候，喺身邊陪住佢，但我無能為力，唔知點做好。我唔會明白昭昭呢一刻嘅感覺，我只想默默咁去支持佢。