vychiu 之二人三貓のblog: 第二天 - 日本東京 -涉谷　原宿　池袋　自由行 (25/4/2007) 之三

2007年5月7日星期一

第二天 - 日本東京 -涉谷　原宿　池袋　自由行 (25/4/2007) 之三

行完[原宿]，我地跟住落嚟嘅果一站，簡直係史上最傻呀！你哋點都估唔到，我哋因為啲戰利品太重，竟然返新宿去酒店放低啲戰利品，先至再出池袋。OOH~~~my god！係東京，個個JR駅都有LOCKER架大人~~，做咩要返酒店呢，浪費晒啲時間，咁啱又兩個一齊唔記得LOCKER呢樣嘢！點解，係日本嘅時間已經嚴重唔夠用，仲要搞啲咁嘅嘢，唉~~~~

好喇！算吧喇，反正已成事實，無謂再提喇，繼續我哋個行程先！！！

返咗酒店放低啲嘢，本來諗住去[好孩子]介紹過嘅一間喺新宿西口食牛扒嘅地方食晏(其實都成4點幾喇，不過係仲未食晏呀)，點知早得滯未開，人家開17:00-22:00，我哋早咗少少去，又唔想等佢開，因為只會再浪費寶貴嘅時間，於是去附近找間速食店醫肚就算喇，唔好要求咁多喇！

呢間又係買食卷嘅，一人一個餐，一SET兩碗，因為肚食關係，我哋食得晒呀！同埋都幾好味嘅！↓呢SET係CHIU SAN嘅

↓呢SET係VYVY嘅

食完梗係第一時間走去搭JR山手線去池袋喇！時間無多喇！為怕我嘅HELLO KITTY 舖頭閂門(就係因為HELLO KITTY先去池袋架)，第一時間去搵咗搵KITTY先，哈哈，搵到喇！搵到喇！係喺sun shine city嘅地下商場入面架，不過有啲失望，因為我個同事話我知以前呢間hello kitty係專賣限量版架，點知...佢...佢....裝修過之後，個舖面係靚咗好多，但已經唔係賣限定版喇，係一間普通嘅sanrio shop喇！十分失望，雖然失望，點都要咁靚嘅大頭kitty前面留影先得。不過就無收獲。

不過就係呢間有收獲。呢度係另外一間係池袋嘅sanrio，本來一心幫我細妹找鴨仔products，以為呢度會有，點知我去咁多日，一次都見唔到，唉，無計，係佢命苦！呢隻kitty咁可愛，梗要同佢合照喇！

係sun shine city行出嚟，對面馬路就係ANIMATE喎，咁正！更係要去睇睇喇。但真係得個睇字，如入寶山空手回。因為全部都係日語漫畫、日語卡通，送俾我都無用。

我哋為免迷路，行返轉頭，天都黑齊喇！

正諗住去搵jean mart買褲之際，咁啱俾我哋見到超大粒八爪魚丸，即刻買一粒嚟試下先。好緊張呀！
.........食咗大半個，先食到一粒仔八爪魚粒，有啲失望，味道都唔錯，但唔係「嘩！」果種，我諗大大粒應該就係佢嘅買點！

搵到jean mart，買完褲，池袋好似無乜嘢好行咁，於是，就準備返新宿喇！走之前，幫個池袋駅留影先！

餘下時間，我地又去新宿蒲喇！
返到新宿，返酒店放低戰利品，又係去醫肚嘅時候，於是我地就去搵我哋好想去試下，人人都推介，旅遊書都推介嘅[博多天神]食拉麵。好緊張呀，好期待呀！差啲唔記得影相就食喇，真係好心急呀！我呢碗有咁多紫菜嘅，就係紫菜拉麵喇！

chiu san呢碗就係义燒拉麵喇！

好唔好食？我唔識講有幾好味，只記得我第一口就飲佢個湯底，chiu san問我好唔好味，我望住chiu san，唔係好試應佢，佢即刻知咩事，佢又飲咗一口，woh~~！大家無聲彷有聲，跟住唔想講嘢，只係食。因為實在太太太太太太太好味，有一種好感動，好幸福嘅感覺，我唔係誇張架，我真係咁覺得，喺香港，真係食唔到架！我哋連湯都飲晒呀，走時只剩下一個吉碗咋。我都係度向大推薦呀！