[溏心風暴] - 程亮死了

前晚同尋晚[溏心風暴]講到程亮同常在心之間嘅感情結局，講到常在心終於send咗封email俾程亮話原諒佢，但可惜程亮亦為咗常在心，日思夜想為她解決工作嘅困難，頻衝紅燈而最終撞車身亡，而未能讀取常在心嘅email。眼淺嘅我，真係喊到差啲收唔到聲。

曾幾何時，我一路睇一路鬧程亮賤格，仲講過如果我係常在心，我一世都唔會原諒佢。但隨住劇情嘅發展，佢哋兩個人之間由情侶變做朋友，再由朋友重燃二人嘅愛情出嚟，程亮願意係常在心背後精神同實際上無限量咁去支持佢，好難得，好珍貴，好感動，最後期望過二人開花結果。可惜劇情就係要呢段感情無花無果，程亮就咁死咗。

最最最感動嘅係，程亮死前一刻，不理傷勢，用盡最後一口氣，搵電話打俾常在心，話佢知自己幫佢搵到工作上嘅解決方法嘅一幕，真係令人好心痛。我無法想像如果我係常在心，我會點樣。

雖然只係電視劇，但世事何嘗唔係咁不能盡如人意咩？真係要珍惜眼前人呀！

但係人就係咁，唔珍惜，跟住後悔，之後又繼續唔珍惜，又繼續後悔．．．．沒完沒了！