第三天 - 日本東京 -東京迪士尼 (26/4/2007) 之三

上回講到我哋係[明日世界]玩，其實都玩得八八九九喇。係時候向下一個地點出發喇！就係我身後嘅[TOONTOWN]喇！

呢度啲嘢好卡通架，你睇個地圖！都colourful過人架！我指住嘅係[我在此]嘅位置。

呢間係高飛狗間屋，好得意咁呀，可惜又係裝整中，無得入內參觀，唯有係出面影下相咁就算喇！

原來高飛有架車架！等我扮吓嘢先！

跟住我哋去咗唐老鴨間屋參觀，呢個係佢個大門口呀！

一入到去，竟然有個浴缸，唐老鴨一定好鍾意沖涼喇！仲有嘢睇喎！

跟住我地就去探訪一下唐老鴨嘅好朋友　──　米奇老鼠，不過想探下佢都幾難呀，要等成50分鐘呀，等到頸都長埋。米老鼠屋企都幾靚架！





終於見到米老鼠喇！


米妮就係住係老奇嘅隔嚟，又去米妮屋企參觀吓先。佢屋前面有個井架！又影！

突然俾我哋見到一個無份玩，有份曬嘅bb仔，好可憐呀！佢又係嚟睇米妮間屋架，不過，睇佢都係睇唔到多喇，咁曬都瞓得著。

跟住我地就去[大鼻][鋼牙]間屋到參觀。

之後我哋去玩呢個[艾芝迷你雲霄飛車]，睇落好似好刺激咁，但事實.........，就係連5歲小妹妹都話好玩！你話有幾刺激喇！

去到[兔子羅傑卡通轉轉車]，chiu san身後的便是。我哋又入咗去玩
。

玩完返出嚟無耐，就見到好多人，原來係[史高治叔叔]呀！好開心呀，細個果陣成日睇佢係錢庫度游水，今日終於可以見佢一面喇，好開心呀！



嘩！玩吓玩吓，唔經唔覺又差唔多1點喇，係時候搵食，於是就去咗[輝兒杜兒路兒好時光咖啡]食lunch喇。

你睇我哋個餐盒幾靚！

我係揀咗唐老鴨餐盒，唐老鴨的確比米奇可愛。

但佢無頭架，我行shop嘅時候，都有幫佢搵返個頭。


[TOONTOWN]又玩得八八九九喇，又食飽飽喇，好！又向下一個地方出發，就係[夢幻世界]喇！一去到，就見到大量小矮人，於是又跑埋去影餐飽。




之後就去繼續玩，呢個[小小世界]喇，之後又去咗玩[Alice's Tea Party]，唔使排，無乜人玩，原來我哋掛住玩又miss 咗巡遊，唔怪之得無人排喇！

呢個pooh pooh都排咗好耐呀！

之後就去睇我最想睇嘅[白雪公主]，真係天有不測之風雲，大家睇下個天，灰晒呀，當我睇完白雪公主之後，就落大雨喇，嘩！好彩我有帶遮，同走咗入去睇[幽靈]同[小飛俠}，出返嚟又停咗雨喇。

'在那些，清新雨後陽光~~~' 就係要唱返首歌，真係估唔到真係雨後陽光，地下仲係濕架，襯仲有陽光，梗係要影睡公主城堡喇！係我地嘅指定動作。我地叫咗個日本男仔幫我地影，之後佢又叫返我地幫佢地影，嘻！雖然言語不通，但都能順利完成任務！

嘩！有巡遊呀，快啲霸位先，如果唔係又睇唔到喇，唐老鴨都攰到仆咗係度喇，睇巡遊當係休息吓喇！

小朋友都一齊表演喎！仲好投入添！

太陽都就落山喇，要快啲玩埋啲嘢喇！去坐下火車欣賞下園景先~~

本來諗住又去霸位睇埋夜晚嘅巡遊，因為我知道係好靚架，但你睇我哋兩個，著晒外套，帶埋帽，就知有幾凍，而且經過一場突然雨，一熱一冷，chiu san病咗，於是，坐咗係度坐咗一陣，吹咗一陣風，終於唔得喇，再等會死人，於是就走人。

走嘅時候，我哋搭JR，呢度係舞滨駅，都幾靚咁喎！

就係咁樣，我哋第三日行程就咁完咗喇，經過一日迪士尼嘅行程，我哋真係好攰好攰，所以呢日剩下來嘅時間，就係好快咁係博多拉麵食完DINNER之後，就休息喇！