第三天 - 日本東京 -東京迪士尼 (26/4/2007)

嚟到第三日嘅東京之旅，亦係我哋嘅迪士尼日，因為各方好友話我知，東京迪士尼好多嘢睇，好大，一定會用我成日。為咗可以舒舒服服咁玩，玩晒啲嘢先走，於是我哋決定全日迪士尼。(唔係海洋果個)

嚟咗東京3日喇，前兩日都係落住雨咁，今日終於係陽光普照，一起身見到好好天，好開心呀，因為如果落雨，我哋未必能如期去迪士尼，落雨點玩呢？

出發喇！落到街，第一次見到有陽光、清晨嘅新宿，嘩！好靚呀，即刻攞部相機周圍影，呢度就係[新宿太子]對面馬路影返過去新宿西口嗰邊，今次我哋唔係去西口喇，今次我哋去新宿新南口坐巴士去迪士尼，一路行，一路欣賞沿途景色先......

喺同一個位，影去左手邊，喺呢度過去，有個鐘果度係東口，不過我哋從來係東口出入，因為唔方便我哋

紅燈等過馬路，又影吓先

差啲唔記得影[歌舞伎町]添！

去新南口，會經過東口，呢個就係頭先果個鐘，7點都未夠呀，只係6:35咋，我哋果日5點幾就起身喇！怕坐巴士會塞車，所以坐早啲果班車囉！本來我係專登影埋個溫度，點知陽光好得滯，影唔到，咁好陽光，你都估唔到當時只有13度咋，好凍呀！

其實沿途都好多鳥雅喺周圍咁飛，仲多過人呀，但因為佢哋不停咁飛，無定向飛，所以影唔到俾大家睇，啲鳥雅真係好大隻架，仲叫得好大聽添，好似驚你見佢唔到咁呀。

到喇，終於都到新南口嘅epressway bus terminal喇，我哋就係喺呢度上車架喇，不過要買張飛先。

呢張就係我哋張飛喇！

買咗飛之後，因為時間無多，我哋搭7:10班車，所以怱怱咁係車站出面間便利店買咗兩個便當，係便利店立食，就啱啱好去上車喇，呢架就係我哋坐去迪士尼架巴士喇！同車仲有一家四口嘅日本人，無其它人喇，好似包車咁，正呀！準備出發喇！車程預計1個小時。

有啲緊張呀，雖然呢朝好早起身，但vy都唔眼瞓，好精神咁周圍睇風景，仲俾我影到相信係東京鐵塔嘅一個塔，其實我唔係好肯定，有無人可以話我知係唔係呢？當時，我當咗係架嘅，所以好開心。

到喇到喇，竟然無塞車喎，7:50就到咗喇，好似太早喇，迪士尼開9:00呀，早咗，又周圍影喇。嘩！迪士尼巴士呀！嘩！大鄉里呀！(指嘅係我呀)

係巴士站行兩步就見到迪士尼列車喇！

我身列車橋直去就係迪士尼入口喇！

呢個就係我面對嘅方向，應該就係係呢度搭迪士尼列車架喇，因為我無搭到，我唔係好肯定。

行喇！快啲去睇吓大門喇，仲唔行，咁我又影吓先。

嚟到大門喇。個早地好靚呀，仲見到閘入面個迪士尼入口添呀！

呢度係售票處，因為我哋一早買咗飛，所以唔使買，但有人排隊喇，啲日本人仲早過我哋嚟呀，唔通佢哋唔使瞓嘅？


行過售票處，有好多個閘口位，不過影唔到，因為已經有好多日本人喺度排隊中，你哋睇！於是我哋又排埋一份，雖然只係8:00....

呢個小朋友排係我哋前面一個，好ka~wa~i~，如果唔係得佢同我玩，呢一個鐘都幾難過呀！

睇呢個小妹妹個look幾得，唔係[得得地]呀，係好得呀，好可愛嘅米妮呀！

等呀等！終於都9:00喇，開咗閘喇，但未入得喎，

原來開咗閘之後，迪士尼啲公仔會出晒嚟同大家打過招呼先，行咗個圈，跟住就可以入去喇！

〔如果要迪士尼大地圖，就只得日文版咖呢，其他都係一張傳單咁大咖咋~~〕

.....待續