第五天 - 日本東京 - 新宿 成田機場 舞浜 (28/4/2007)

終於嚟到原定行程嘅最後一日喇！心情簡直係十億個唔願走呀！

08:00出發，其實本應唔使咁早，不過我哋唔想錯過係日本嘅一分一秒，所以早啲出去行吓，博一博會唔會有嘢睇！

日本嘅清晨，好多烏鴉，我哋每朝出發，烏鴉們都會為我哋歡呼(其實唔知佢哋叫到鬼殺咁嘈做乜)。呢日係星期六，一大清早已經有啲打扮到鬼火咁靚嘅日本妹係條街到行喇 (其實又唔知佢哋係由尋晚玩到而家，定係啱啱出發)，我地首先要完成寄POSTCARD嘅使命先，搵呀搵，終於搵到郵局(差唔多搵咗30分鐘)，點知，日本郵政係5天工作周架，今日偏偏係星期六，唉，失望！啲postcard唯有放係hotel叫人幫我哋寄喇！郵便局就唯有影相補吓數喇！咁啱有隻烏雅企定定俾我哋影喎，哈！終於影到喇！YO!!!

我身後咪就係閂咗門嘅郵便局囉！

寄唔到POSTCARD，因為太早，乜都未開，就去食早餐先。但行咗好耐，都唔見有嘢食，正當失望之際，俾我哋見到對面街間[松屋]有開喎，太好喇，就係果度食喇！


等過馬路，影底啲美好回憶先。

啲日本人一早起身就食飯，仲咁大份添，不過確實係好味，好味過[吉野家]呀！



跟住返酒店check out，將行李放係酒店，再出發。
之後就用有限嘅時間，係新宿再Shopping。仲俾我搵到新一期 [Nail Max]哈！好開心呀！


跟住我哋就去行咗咁多日以嚟都從未有行過嘅百貨公司，恨咗好耐架喇，終於有時間行喇！不過百貨公司都原來唔係好啱我哋行，全部賣貴嘢......

不過我哋就好鐘意行地庫嘅呢一層，點解？你睇吓下面啲食物幾咁吸引我哋就係度買咗兩包玄米茶，yeah!!!好美味呀!!!





跟住，又以極速嘅時間去再shopping，[無印]喇，[Jean Mart]喇...每載而歸呀！

不過，實在唔夠時間呀！要趕去搭15:13班車去[成田機場]，於是我哋去多一次[博多]食最後一次嘅拉麵，拉麵san，我永遠懷念您。幾唔捨得，都要走喇！攞晒行李，喺我哋平時出入嘅門口影返張相先。睇吓chiu san都無晒心機喇！咪睇我哋一個一個喼咁少呀！其實好重架！


我哋係[新宿西口]有個賣JR 即日票嘅counter買飛，係日本5日最唔願買嘅就係呢樣。

再見喇！新宿~~我會好懷念你，你永遠常在我心~~

一路搭車嚟嘅時候，天氣急轉直下，由頭先天朗氣清，變得行雷閃電，落大雨，連個天知道我哋要走，佢都唔捨得喊咗出嚟喇。
話都無咁快，咁就到咗機場喇！排隊去 check in先！


話咁快又過埋關喇！


睇吓chiu san，想喊喇！個天真係喊緊呀！

我哋去我地登機閘下睇睇去得機未，因為已經差唔多17:35喇，係時候走喇。資料未出未有得上機住，我哋又去shopping，買下手信咁，又去食吓嘢先，我哋食咗麥記呀，原來佢啲飽同香港唔同，一個係鷄，一個係蝦，又幾得意架喎！


係呢個時候，班機都仲未降落，又未有航班資料，咁即係delay喇！好嘢，我恨都恨佢delay係日本留耐啲呀，你睇我幾開心咁打電話返屋企報喜！我諗當時得我兩個會咁開心架咋！


等呀等，18:30等到20:30，有結果喇，班機因被雷電打中嘅關係，係[仙台]機場維修不果，要取消喇！航空公司仲會安排返一晚酒店同埋晚飯添！再安排明天坐其它航空公司嘅機走！YOYOYO！終於俾我恨到喇，真係留多係日本一日呀！超正呀！仲唔使錢添呀！賺晒呀！但係呢個時候，其它人就開始拍枱喇！情況好混亂呀！日文、英文、廣東話一人一句，嘩！啲工作人員勁俾人鬧呀！我哋兩個？！咪企埋一邊睇嘢囉，等航空公司安排酒店囉！

又等咗兩個鐘，啲人都鬧咗兩個鐘，終於有安排喇，又入返境，第二次入境喇去停車場搭旅遊巴去酒店，你睇我幾開(其實好凍)。雖然唔知住邊間酒店， 我估係機場附近啲Cheap酒店or民宿咁喇！不過無所謂喇，留多一日喎，賺到笑呀！我哋唔同人急，坐最後果班車。由呢一刻開始，我哋變咗[團友]！哈哈！

睇吓前面幾多[團友]！好似又再出發咁呀

上車嘅時候，一人一個box set，以為正嘢，點知係冰凍的。
開車喇！咦！唔對路喎，越行越遠嘅！嘩！11:00開車，行咗成個鐘，返咗東京，東京啲酒店應該full架喎，究竟係邊間酒店呢？.........唔係嘛！我初時以為自己眼花，去咗迪士尼出面間HILTON HOTEL，5星級架喎，咁益我哋？！呀！~~~救命呀，係真架！我哋真係喺HILTON HOTEL落車呀！實在太好運喇！

CHECK IN好，食埋免費dinner，其實已經00:00，上到房，我哋房號1188，簡直嘆為觀止呀

~~大到呢！有兩張雙人床size嘅單人床，仲有個廳，嘩！


個浴室靚到呢~~~



跟住我哋就要落返去睇我哋明天飛個時間同航班！

呢度有個咁得意嘅counter俾小朋友玩喎，等我都扮吓小朋友先！

好喇！係時候返上房休息喇，咁樣走嚟走去嘅一日，都係好攰呀！不過返房，我仍然堅持每日瞓之前睇吓日本電視節目，雖然唔知佢講咩，但有時會大約知佢哋講咩！好開心架！