超好味嘅日本玄米茶呀～～～ ( ＾ｏ＾ )

呢幾日喺公司好得閑，無乜嘢搞，於是成日飲茶，下邊呢包，又係我四月去東京時買嘅，真係好好味嘅！一沖出嚟，隔離位個同事都話好香呀！

除咗上次果包喺築地買嘅〔綠茶〕之外，仲買咗呢包。呢一包係最後一日喺〔新宿〕嘅〔伊勢丹〕落一層地庫買嘅。呢一層本身分咗幾個唔同嘅區別，一部份係賣便當嘅，有好多檔，有好多選擇，又靚，我諗啲日本人真係好鐘意食喇；一部份係賣和菓子，又係有好多檔，嘩！靚到根本唔會捨得食咗佢，包裝又靚，花多眼亂，所以無買。入返正題，地庫嘅一少部份係賣茶，我本身好鐘意飲玄米茶，看到茶已經衝咗埋去，見到玄米茶就唔理三七二十一，買！其實佢本身係散裝，一大個盒裝晒啲荼葉，每100g就500日元，咁我就要200g，我初時以為佢會袋入好佢就算，原來佢哋定咗一個袋就100g，所以要入兩個袋。等咗一陣，好奇怪佢將我個兩包茶放咗入個膠兜器皿入面，其實真係唔知佢做緊咩，佢一攞出嚟，眼前一亮，原來佢仲將我嘅茶用機真空處理及封口，個袋仲咁鬼靚添！

後面仲即刻貼返個〔賞味期限〕嘅貼紙，我覺得好新奇呀，counter 細細，設備齊全唔馬虎，日本呀！你真係一個好地方呀！