竟然去咗食[元氣] ( - _ - )!

尋日，chiu san好想食壽司，於是我哋就走咗去價錢大眾化嘅[元氣]食。已經喺日本食過好嘢嘅我哋，對佢已不太大期望架喇，但估唔到個結果.....

一坐低，chiu san就攞咗佢至愛，[玉子燒]壽司，呢個都ok，不過不失，話晒都係熟食。

跟住梗係我嘅至愛喇，老實講，我係第一次食[三文魚]食唔到佢有味囉。但喺咁多件壽司入面，佢已經係最有魚味同最有光澤喇！

[蟹籽]壽司，亦都只係不過不失，要一提嘅係，啲醬油好咸，完全係食醬油，唔係食魚。

跟住chiu san想回味一下喺新宿[北澤俱樂部]嘅帶子壽司，於是就攞咗呢個[帶子]壽司，OPPS~~~~呢度兩件先等於人家一件，味道就.....都係唔想講。

最後，都係要叫呢度最出名嘅[軟殼蟹手卷]，幸好呢個還有好嘅水準，全靠呢個，我哋終於都有啲嘢到肚喇！

最後我哋又叫咗一客[八爪魚]壽司，OPPS~~~啱啱喺冰箱攞出嚟一樣....食到無晒心機。於是我哋決定埋單走人。

雖然只係百二蚊埋單，但仍覺得好唔抵。結果，我哋就決定以後唔去[元氣]，因為我哋認為壽司並唔係咁樣，壽司最緊要係新鮮。

為食嘅我哋，食過好味嘅嘢，就食唔返平較平凡嘅嘢，還記得，好耐之前，我哋仲覺得[元氣]好好味，睇怕以後都幾難好有咁嘅諗法喇！